Хайалара дуобаттаан кыайыай? Сарсын, муус устар 1 күнүгэр, “Саха” Национальнай көрдөрөр-иһитиннэрэр хампаанньа сааскы саҥа бырайыагын чэрчитинэн, аан дойду 7 төгүллээх чөмпүйүөнэ Гаврил Колесов уонна аан дойду 4 төгүллээх чөмпүйүөнэ Николай Стручков нуучча дуобатыгар күөн көрсүүлэрэ тэриллэр.
Билиҥҥи кэм күүстээх дуобатчыттарын оонньуулара олохтоох бириэмэнэн киэһээ 21:00 чаастан “Саха” тэлэбиидэнньэтигэр быһа көрдөрүллүө. Эрдэ быһаарыллыбытын быһыытынан, оонньуу кыайыылааҕа 100 тыһ. солк. харчынан наҕараадаланыаҕа.
Бу интэриэһинэй оонньуу туһунан биһиги “Эдэр саас” сайтка анаан, Өрөспүүбүлүкэтээҕи Дуобат уонна саахымат киинин дириэктэрэ, Дуобат федерациятын вице-бэрэсидьиэнэ Алексей Бурнашевтан билиһиннэрэ түһэригэр көрдөстүбүт.
—Оонньуу киэһээ 21:00 чаастан саҕаланар, — диир Алексей Юрьевич. – Быһа холуйан, 40-45 мүнүүтэ оонньуохтара. Гроссмейстердар туох баар дьоҕурдарын, өйдөрүн-санааларын ууран туран оонньуурга бэлэмнэр. Кыайыылаахха бириис даҕаны кырата суох – 100 тыһ. солкуобай. Балаһыанньа быһыытынан, оонньуу үс микро-матчтан туруоҕа, 2 мүнүүтэ иһигэр биирдии хаамыы оҥоһуллуохтаах. Өскөтүн ити болдьоххо оонньуу тэҥнэһиинэн (1,5:1,5) түмүктэннэҕинэ, салгыы ким кыайыар диэри киирсиэхтэрэ. Манна даҕатан эттэххэ, Үүнэр көлүөнэ фондата (генеральнай дириэктэр С.В.Местников) уонна Дуобат-саахымат федерацията спорт бу көрүҥүн сайыннарыыга анал бырагырааманан үлэлиибит. Ол быһыытынан, араас тэрээһиннэри, маастар-кылаастары ыытабыт. Ылан көрдөххө, бастыҥ дуобатчыттарбыт бэйэлэрин төрөөбүт өрөспүүбүлүкэлэрин иһигэр утарыта көрсөн оонньоон көрдөрө иликтэр. Бу күөн көрсүү – дуобаты сайыннарыыга туһуланан тэриллэр. Бу иннинэ, 2014 сыллаахха Санкт-Петербурга уһун оонньууга Николай Стручков 2:1 ахсаанынан Колесовы кыайбытын өйдүүгүт. Суперматч судьуйаларынан норуоттар икки ардыларынааҕы арбитрдар: Иннокентий Андросов уонна Дмитрий Сыромятников үлэлиэхтэрэ. Оттон быһа биэриигэ оонньуу хаамыытын СӨ дуобакка сүүмэрдэммит хамаандатын кылаабынай тренерэ, гроссмейстер Александр Азаров кэпсээн, быһааран биэриэҕэ. Түргэн оонньуу буоларын быһыытынан, эрдэттэн ким кыайарын быһаарар уустук. Этэргэ дылы, ким үчүгэй бэлэмнээх, кытаанах хараахтардаах – ол кыайыаҕа. Мин санаабар, дуобатчыттар оонньуур таһымнара араа-бараа, сирэй көрсөн кыайсыыларын даҕаны ахсаана тэҥ сыһа буолуохтаах. Барыта биир хаамыыттан тутулуктаах буолуоҕа. Онон биһиги тыҥааһыннаах, интэриэһинэй оонньууну күүтэбит.
Дьэ онон, сарсын киэһээ спорду таптааччылар оллоонноон олорон, тэлэбиисэринэн быһа биэриигэ сэргэх киирсиини көрүөхпүт. Хайалара кыайыай? Гаврил Колесов дуу, Николай Стручков дуу?
Петр ПАВЛОВ, “Саха сирэ”, www.edersaas.ru