Бэлиитикэ

«Суперкампуска» улахан болҕомто уурулунна

«Система» АФК дириэктэрдэрин холбоһугун бэрэссэдээтэлэ Владимир Евтушенков уонна СӨ Ил Дархана Айсен Николаев Петербурга норуоттар икки ардыларынааҕы экэнэмиичэскэй пуорум иитинэн көрсөн дьыалабыай кэпсэтиини ыыттылар.

Икки өттүттэн бииргэ үлэлээһин туһунан кэпсэттилэр, ол иһигэр үөрэх уобалаһыгар бырайыагы дьүүллэстилэр. Айсен Николаев уонна Владимир Евтушенков Саха сиригэр 80 тыһыынча кв.м. иэннээх элбэх хайысханы толорор орто анал үөрэх кыһатыгар — «Суперкампуска» улахан болҕомтолорун уурдулар. Манна сылга 6,5 тыһыынча устудьуону үөрэтэри былаанныыллар, ол иһигэр 4,5 тыһыынчата — күнүскү (очнай) төрүккэ олоҕуран. Баараҕай уораҕайга үөрэнэр сирдэри таһынан, уопсай дьиэ, култуурунай сынньалаҥы тэрийэр, успуордунан дьарыктанар сирдэр, коворкиннар, экспокииннэр, экэниэмикэ салааларынан экспериментальнай былаһааккалар баар буолуохтаахтар.
Бырайыагы судаарыстыбаннай-чааһынай бииргэ үлэлээһин мэхэньиисимин туһанан олоххо киллэрэр былаан баар. Ил Дархан орто анал үөрэх кыһаларын эбийиэктэрин саҥардан биэриигэ  саҥа ирдэбиллэргэ уонна үлэ ырыынагын уларыйыыларыгар олоҕурар маннык сыаллаах-соруктаах дьоһуннаах туһаайыы Сэбиэскэй кэмтэн суоҕа диэн санаатын үллэстэр.
«Биһиги олус үрдүк хаачыстыбалаах орто анал үөрэх кыһатын туһунан өрөспүүбүлүкэ эрэ иһинэн буолбакка, Уһук Илиҥҥэ уонна дойдуга бүттүүнүгэр кэпсэтэбит. Арассыыйаҕа маннык холобурдар өссө суохтар. Өрөспүүбүлүкэ билигин квалификациялаах каадырдарга наадыйара улахан. Онон бырайыак каадырдары бэлэмнээһиҥҥэ уонна экэниэмикэ саҥа салааларыгар, ол иһигэр креативнайдарга сайдыыны биэрэр тирэҕинэн буолуохтаах», — диэтэ Айсен Николаев.
0
0