Бу күннэргэ дьыалабыай отчуоттар эрэ буолбакка, 2018 cылы түмүктүүр араас тэрээһиннэр ыытыллаллар.
edersaas.ru
Суотту нэһилиэгин баһылыга Иннокентий Иванов 20-с төгүлүн Сыл түмүгүн таһаарар бырааһынньыгы тэрийэр. Олохтоохтор бу күнү анаан кэтэһэллэр.
— Бу дьону түмэр, патриотическай тыыны үөскэтэр тэрээһини олохтоохтор олус сөбүлүүр буолан, сыл аайы күүтэбит. Өр көрбөтөх дьоммутун көрөн, биир дойдулаахтарбыт ситиһиилэрин үллэстэн, көрү-нары көҕүлүттэн тутан, бэркэ сэргэхсийэн тарҕаһабыт, — диэн санаатын үллэстэр педагогическай үлэ бэтэрээнэ, нэһилиэк ытыктанар олохтооҕо Серафим Федоров.
Дьоро киэһэ олохтоох предпринимателлэр лотерея тэрийбиттэр, саха эстрадатын сулустара олохтоохтору кытта ыллаан, «Икки сулус» ырыа куонкуруһугар кыттыбыттар.
— Ол курдук, Наталия Местникова оҕуруонан үлэтин, Владимир Решетников — «вулкан-сыаҕар», парикмахер Ульяна Татаринова бириис-сертификаттары туруордулар. «Бастыҥ үҥкүүһүт» номинацияҕа Дмитрий Львов кыайан, баһылыктан духуопка бэлэх ылла. «Бастыҥ таксист» номинацияҕа Василий Яковлев тигистэ. Ити курдук киһи кыайыылаахтары ааттыы туруон сөп.
«Икки сулус» куонкуруска Алена Стрекаловская Варя Ларионовалыын-Ый Кыыһынаан, Василий Ефимов Лэгэнтэйдиин, Алена Прудецкая Никалыын, Елизавета Портнягина Эрчимниин ыллаатылар. Биһиги кыргыттарбыт сулустартан олох хаалсыбаттар, сороҕор баһыйарга дылылар, — диэн салгыы кэпсиир Серафим Данилович.
Суоттулар сэргэхтик олороллорун курдук, улуустар нэһилиэктэрин аайы дьону түмэр, көҕүлүүр тэрээһиннэр элбии турдуннар.
Елена ПОТОЦКАЯ, «Саха сирэ» хаһыат, edersaas.ru
Хаартыска — Серафим Федоров архыыбыттан.