Суоттулар Өрөспүүбүлүкэ күнүгэр тыыл бэтэрээннэригэр кыстыыр мастарын бэлэмнээтилэр

Өрөспүүбүлүкэ күнэ сүрүннээн пааматынньыктарга сибэкки ууруунан, мунньахтарынан, сэлэлээн хаамыынан уонна оһуохайынан бэлиэтэнэр эбит буоллаҕына, Уус Алдан улууһун Суотту нэһилиэгин олохтоохторо бу күн суолталаах бырааһынньыгы  үгэс быһыытынан субуотунньугунан бэлиэтииллэр.

Нэһилиэк баһылыга  Василий Иванов сыл аайы бу күн тыыл бэтэрээннэригэр уонна кырдьаҕастарга, инбэлииттэргэ  анаан субуотунньук тэрийэн, оттук  мас  бэлэмнииллэр.

Тэрээһиҥҥэ нэһилиэк  бары  тэрилтэлэрэ  актыыбынай кыттыыны ылаллар.

— Бары күргүөмүнэн сүүрбэ  сыарҕа  маһы  эрбээн, хайытан,  тиэйэн  тыыл  бэтэрээннэригэр дьиэлэригэр тиэйэн биэрдибит. Баһылыкпыт  ытык дьоммутугар босхо өйөбүл оҥорон,  анаан субуотунньугу тэрийбитэ уонтан  тахса  сыл  буолла.

Бастаан  сыаналаах  бириистэри  олохтоон оттук  мас  бэлэмэр  күрэхтэһии  тэрийбитэ. Кэлин  уонча  сылга  наар  субуотунньук  күүһүнэн күргүөмүнэн тахсан кырдьаҕастарбытын үөрдэбит. Субуотунньук дьон  сүргэтин олуһун  көтөхтө, — диэн кэпсиир педагогическай үлэ уонна спорт  бэтэрээнэ Серафим Федоров.

Суоттулар субуотунньук эбиэтин кэмигэр оһуохайдаатылар, спорт көрүҥнэригэр күрэхтэһэн да  ыллылар.

Тыыл бэтэрээннэригэр маннык босхо субуотунньугунан кыстыыр мастарын бэлэмнээһини тэрийэр   нэһилиэк баһылыга тарбахха баттанар.

 Оо, Суотту нэһилиэгин баһылыга Василий Иванов бастыҥ холобура саатар Үтүө дьулуур сылыгар үгүс баһылыктарга холобур буоллар ханнык!

Елена ПОТОЦКАЯ, «Саха сирэ» хаһыат, edersaas.ru