Уус Алдан улууһун Суотту нэһилиэгэр «Кэлэр кэм индустрията» автономнай кэмиэрчэскэйэ суох тэрилтэ үлэһиттэрэ тыа сирин сайдыытыгар анаммыт бырайыактары ырыттылар, торумнаатылар.
Тэрилтэ дириэктэрэ Иван Степанов, менеджер Сандаара Егорова «Тыа сирин саҥа тыына» бырайыактыыр сиэссийэлэригэр уопсастыбанньыктар көхтөөхтүк кыттыыны ыллылар.
«Өрөспүүбүлүкэ сэттэ нэһилиэктэриттэн биэстии киһилээх хамаандалары «Сайдыы» диэн тыа сиригэр туһуламмыт сонун бырайыактары дьүүллэспиттэрэ. Онно Суотту нэһилиэгин хамаандата кыттан баран, бэркэ сэргээбитэ уонна тэрилтэ үлэһиттэрин Суоттуга кэлэн үөрэх ыытарга көрдөспүппүт«, — диэн суруйар олохтоох дьаһалта бэйэтин инстаграмыгар.
Онон маннык тэрээһиннэр тыа сиигэр олус наадалахтарын туоһулаан, сонун хайысхаларга үгүс санаа этилиннэ, быйылгы сылга үлэни көхтөөхтүк саҕалыырга олук уурулунна.
Елена ПОТОЦКАЯ, “Саха сирэ” хаһыат, edersaas.ru