Суотту нэһилиэгэ — Уус Алдан улууһун аартыга. Кэлэр-барар айанньыттар аартыкка турар нэһилиэгинэн улуус сайдыытын, олоҕун быһаараллара биллэр.
Өрүстэн Суоттуга тахсаат да, былыргы «Холбос» тэрилтэ быраҕыллыбыт дьиэлэрэ айгыраан тураллара харахха тута быраҕыллар. Киэҥ иэннээх сири былыргы маҕаһыын, 2 бэкээринэ, остолобуой, ыскылааттар, хочуолунай, булуус, гараас түөрэ-лаҥкы түһэннэр түһээтэхтээҕи дойдуну санаталлар. Уус Алдаҥҥа үктэнээт маннык көстүү бүтүн улууһу күлүгүрдэр.
Маны барытын таба өйдөөн, нэһилиэк баһылыга Василий Иннокентьевич Иванов көҕүлээһининэн, муус устар 29-30 күннэригэр бу сайын Бороҕоҥҥо буолуохтаах успуорт VIII оонньууларын көрсө ырааһырдыы үлэ чэрчитинэн Суотту нэһилиэгин тэрилтэлэрэ, Маай, үлэ бырааһынньыгын көрсө күргүөмүнэн, көхтөөхтүк субуотунньукка таҕыстылар.
Тэрилтэлэрбит: Дьиэ-уот, коммунальнай хаһаайыстыбата (сал. Черкашин Н. Н.), баһаарынай чаас (Местников Н. Н.), Суотту орто оскуолата (Петухова И. М.), Хоноҕор сүрүн оскуолата (Горохова О. Е.),»Мичээр» СК (Патрасова В. В.), «Түһүлгэ» СК. (Гоголева Е. Н.),техникум (Стрекаловскай А. В.), РЭС (Степанов И.И.), Элиэнэтээҕи «Доҕордоһуу» түмэлэ (Новоприезжая Н. Я.), социальнай харалта үлэһиттэрэ уонна нэһилиэкпит аҕам саастаахтара. Ону таһынан чааһынай тиэхиньикэлээх дьоммут: Татаринов И. С., Охлопков А. Н., Киренскэй В. И., Суотту орто оскуолатын тыраахтара (Константинов А. А.) улахан көмөнү оҥордулар.
Бу күннэргэ былытынан бүдүгүрэн турбут халлаан, «баһаалыста үлэлээн» диэбиттии, халлан,күнэ сандааран,сылааһынан сыдьаайан дьону үлэҕэ угуйда. 100-эн тахса киһи үлэҕэ туруммута тугу тулутуой, дьон да маннык түмсүүнү суохтаабыт эбит. Бары күлэ-үөрэ үлэлээн, күнүс итии аһылыгы аһаан, сааскы салгынынан дуоһуйа тыынан хаһан да кыайтарыа суох курдук эргэ тутуулар көрүөх бэтэрээ өттүгэр ырааһыран «нэлэс» гыннылар.
«Үлэ түмэр күүс!» буоларын суоттулар итэҕэйдилэр. «Норуот күүһэ-көмүөл күүһэ!»
«Саха сирэ», edersaas.ru анаан Иннокентий ПОПОВ-ОҔУРУОТТААХ