Өлүөнэ Эбэ ньуура хаатыттан таҕыстаҕына, Уус Алдан улууһугар ыксатыан сөптөөх сирдэрэ — Суотту уонна Бороҕон нэһилиэгин Арыы Тиит учаастага.
edersaas.ru
Суотту нэһилиэгин олохтоохторо Оҕуруоттаах уонна Хоноҕор диэн сирдэринэн түөлбэлээн олороллор. Сарсыарда 11 чаастааҕы иһитиннэриинэн, Суотту аннынан өрүс устан эрэрэ биллибитэ. Муус Кангаласс аннынан халҕаһалыы анньан турбута. Маныаха, өскө, Оҕуруоттаахха уу муҥутаан 1051 см тийдэҕинэ, Хоноҕорго 822 миэтэрэни өрө астаҕына, дьону көһөрөр сорук турар.
Суоттуга көмүөл мууһа хайдах ааһарын кыраҕытык кэтииллэр. Нэһилиэк баһылыга Василий Иванов балаһыанньаны маннык билиһиннэрдэ:
— Баччаларга халаан кэлэригэр олохтоох нэһилиэнньэ өрүү бэлэм олорор. Быыһыыр сулууспаттан биэс быыһааччы кэлбитэ. Нэһилиэккэ Уус Алданнааҕы бэтэринээрдэр сулууспаларыттан уонна тыа хаһаайыстыбатын управлениеларыттан исписэлиистэр бааллар. Икки дьону эвакуациялыыр пууну — Хоноҕорго 200 миэстэлээх Уус Алданнааҕы тиэхиньикуму, Оҕуруоттаахха оскуоланы бэлэмнээтибит.
756 хороҕор муостааҕы үрдүк сиргэ далга хаайдыбыт. 320 сылгыны хаайан, эмиэ тустаах дьон маныыллар.
Быйыл Өлүөнэ Эбэ мууһа этэҥҥэ барар ини диэн эрэнэбит. Кангаласс аттыгар харан турбут мууһу дэлби тэптэрдилэр. Онон чаас курдугунан муус хамсааһына биллиэҕэ.
Елена ПОТОЦКАЯ, «Саха сирэ» хаһыат, edersaas.ru
Хаартысканы Василий Иванов тиксэрдэ