Бу күннэргэ Уус Алданнааҕы тиэхиньукум 1-кы курсун устудьуоннарыгар, кинилэр куратордарыгар уонна үөрэтэр маастардарыгар биир бэлиэ долгутуулаах күн буолан ааста.
Бу туһунан Суоттутааҕы «Түһүлгэ» култуура киинин салайааччыта Екатерина Гоголева маннык билиһиннэрдэ:
— Улууспутугар быйыл Сомоҕолоһуу уонна айымньылаах үлэ сыла түмүктэнэн эрэр. Быйылгы сылга Хоноҕор «Кыһыл Кырдалыгар» үлэлии олорор тэрилтэлэр: Сергей Васильев-Борогонскай — 115, кини аатын сүгэр Хоноҕор сүрүн оскуола- саада — 130, «Түһүлгэ» сынньалаҥ киинэ — 60, Уус Алданнааҕы тиэхиньукум — 50, олохтоох бибилэтиэкэ — 45 үбүлүөйдээх сылларын бэлиэтээтилэр. Онно анаммыт тэрээһиннэр «Бииргэ буолуу — түмсүү, ситиһии, сомоҕолоһуу — кыайыы» диэн тосхолунан киэҥ ис хоһоонноохтук ыытыллан, айар үлэлэрин билиһиннэрии быһыытынан барда. Бу тэрээһиннэри суоттулар эһиил бэлиэтэнэр Саха АССР 100 сылыгар анаатылар. Айар үлэни сырдатыыны нэһилиэк баһылыга Василий Иванов сүрүннээтэ.
Суоттутааҕы тиэхиньукум салалтата сыл аайы «Устудьуон сүрэхтэниитэ» бэлиэ тэрээһини тэрийэн ыытар. 9-с кылаас кэннэ асчыт, кондитер, тутуу, ОДьКХ исписэлиистэрин бэлэмниир салааларга үөрэнэр оҕолор бэйэлэрин уһуйааччыларын кытта тэрээһини бииргэ көҕүлээн ыыттылар.
Быйылгы үбүлүөйдээх сылга үөрэх кыһата бэрт үгүс үлэни ыытта. Үөрүүлээх тэрээһиҥҥэ өрөспүүбүлүкэ биир кырдьаҕас орто анал үөрэҕин кыһатын дириэктэрэ Андрей Стрекаловскай тиэхиньикум үлэтин сырдатан туран, инники былааннары билиһиннэрдэ.
Салайааччы эҕэрдэ тылыгар тиэхиньикумҥа бүгүҥҥү күҥҥэ бастакы кууруска 32 устудьуон күнүскү үөрэххэ үөрэнэрин иһитиннэрдэ. Ыччаттар төһө да уустук кэмҥэ үөрэнэ сырытталлар, үөрэххэ, уопсастыбаннай үлэҕэ көхтөөхтүк кытталларыгар ыҥырда. Үөрүүлээх быһыыга-майгыга 1-кы куурус устудьуоннарыгар устудьуон билиэтин туттарда.
Үүнээри турар үбүлүөйдээх сыл устудьуоннарга да, уһуйааччыларга да умнуллубаттык, бэлиэтик ааһарын туһугар бары тэрээһиннэргэ бу курдук бары бииргэ тутуспутунан сылдьан актыыбынайдык кытталларыгар баҕарда.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Валентина Бубякина түһэриитэ.