Саха литературатын төрүттээччи, бэйиэт, прозаик, драматург, судаарыстыбаннай уонна уопсастыбаннай диэйэтэл Былатыан Ойуунускай төрөөбүтэ 125 сылыгар анаан Уус Алдан улууһугар араас литературнай тэрээһин тиһигин быспакка ыытыллар.
edersaas.ru
Ол курдук, Сергей Васильев-Борогонскай аатынан улуустааҕы киин библиотека үлэһиттэрин көҕүлээһининэн нэһилиэктэринэн ыытыллар «Уран тыл алыба» диэн литературнай тэрээһин чэрчитинэн Суотту нэһилиэгэр истиҥ көрсүһүү буолан ааста. Бу күн Суотту орто оскуолатыгар уонна Хоноҕордооҕу «Түһүлгэ» сынньалаҥ киинигэр нэһилиэк дьоно-сэргэтэ, оскуола үөрэнээччилэрэ, Уус Алданнааҕы техникум устудьуоннара тэрээһиҥҥэ түмсэн, кыттыыны ыллылар.
Сергей Васильев-Борогонскай аатынан Хоноҕор оскуолатын бэһис кылааһын үөрэнээччилэрэ (сал. СӨ үөрэҕириитин туйгуна М.В. Соловьева ) Ойуунускай «Көҥүл ырыата» хоһоонун доргуччу ааҕан тэрээһини үөрүүлээхтик астылар.
Киин библиотека кыраайы үөрэтэр салаатын сэбиэдиссэйэ Ольга Павлова «П.А. Ойуунускай уонна 1936 сыллааҕы Чараҥ ыһыаҕа», «Сыккыс» библиотека үлэһитэ Анна Готовцева «П.А. Ойуунускай хоһоонун дьоруойа Ирина Олесова» дакылааттарын толору арыйан сүрдээх интэриэһинэйдик кэпсээтилэр.
Нэһилиэк бочуоттаах олохтооҕо, профтехүөрэхтээһин бэтэрээнэ Серафим Федоров суоттулар 1936 сыллаахха Чараҥ ыһыаҕар кыттыыларын туһунан кэпсээбитин, мустубут дьон олус сэргээн иһиттибит.
Серафим Данилович Былатыан Ойуунускай олоҕун туһунан бэрт дириҥ ис хоһоонноохтук арыйан сырдатта. Ытыктыыр киһибит Ойуунускай хоһооннорун төлөннөөхтүк ааҕан иһитиннэрдэ.
Тэрээһин түмүгэр библиотека үлэһиттэрэ Былатыан Ойуунускай хоһооннорунан литературнай дьүһүйүүнү толордулар.
Маннык иһитиннэрэр-сырдатар дириҥ ис хоһоонноох тэрээһин ыччаты уонна саастаах дьону бииргэ түмэрэ, көлүөнэлэри ситимниирэ көһүннэ. Бу күн суоттулар кыралыын-улаханныын улуу Ойуунускайы ис сүрэхтэн тахсар тылларынан уруйдаатылар.
Ирина ОСИПОВА,
Уус Алдан улууһун кииннэммит библиотека тиһигин
Хоноҕордооҕу салаатын үлэһитэ.
«Саха сирэ» хаһыат edersaas.ru саайтыгар анаан