Сүрүн Үөрэх уонна наука

Суоттуга “Үөрэх” национальнай бырайыагынан саҥа оскуола аһылынна

Уус Алдан улууһун Оҕуруоттаах сэлиэнньэтигэр үөрүүлээх быһыыга-майгыга 220 миэстэлээх Суотту оскуолатын астылар. Бу иннинэ оҕолор түөрт дьиэнэн үөрэнэллэрэ. 1975 сыллаах саахалланар туруктаах оскуоланы тоҕус сыл анараа өттүгэр көтүрбүттэрэ.

edersaas.ru

Үөрэх саҥа эйгэтэ сөптөөх инфраструктураны эрэйэр. Эргэрбит оскуолаҕа үөрэх үрдүк хаачыстыбалаах буолуо диэн толкуйдуур кыаллыбат. “Үөрэх” национальнай бырайыак баар буолан өрөспүүбүлүкэ улуустарыгар, куораттарыгар аныгы оскуола ыстандаартыгар сөп түбэһэр саҥа эбийиэктэр тутуллаллар”, — диэн Саха сирин Ил Дархана Айсен Николаев бэлиэтээтэ.

СӨ Бырабыыталыстыбатын аатыттан бэлиэ күнүнэн сэлиэнньэ олохтоохторун вице-премьер Сергей Местников эҕэрдэлээтэ уонна оскуола кэллэктиибигэр махтал суругу, бибилэтиэкэлэригэр 100 ахсааннаах уус-уран литэрэтиирэ сэртипикээтин туттарда. Производственнай үөрэх маастара Екатерина Васильева СӨ Бырабыыталыстыбатын кыраамататынан наҕараадаланна.

Бырабыыталыстыба бэрэссэдээтэлэ тыл этэригэр, бу иннинээҕи кэми кытта тэҥнээтэххэ, кэлиҥҥи сылларга үөрэнээччи ахсаана эбиллэрин бэлиэтээтэ итиэннэ нэһилиэккэ хаачыстыбалаах үөрэҕи тэрийэргэ усулуобуйа барыта олохтонон, урукку үрдүк таһымы ситиһэллэригэр баҕарда.

Икки мэндиэмэннээх 4497 кыбадыраат иэннээх оскуолаҕа, үөрэнэр кылаастары таһынан лабаратыарыйа анал кэбиниэттэрэ, мастарыскыайдар, лингафоннай мультимедийнэй кэбиниэт, кэмпириэнсийэлиир саала, успуорт саалата, хореография хоһо, бибилэтиэкэ, астыыр блоктаах 78 миэстэлээх эбиэттиир саала бааллар. Оскуола тэлгэһэтигэр бүрүөһүннээх футболлуур хонуу, сүүрэр суол уонна спорт былаһаакката тутуллубуттар. Оскуолаҕа “Точка роста” сыыппара уонна гуманитарнай хайысхалар киинэ итиэннэ Үөрэх цифровой эйгэтэ тэриллибиттэр.

Күн бүгүн Суотту оскуолатыгар 11 кылаас-кэмпилиэккэ 178 оҕо үөрэнэр. Кэлиҥҥи биэс сылга үөрэнээччилэр Бүтүн Арассыыйатааҕы араас тэрээһиннэргэ ситиһиилээхтик кытталлар, судаарыстыбаннай олимпиадалар эрэгийиэннээҕи түһүмэҕин финалистара буолаллар. Спорт сиэксийэлэрин иитиллээччилэрэ өрөспүүбүлүкэ, Уһук Илин таһымнаах тустуу, мас тардыһыы уонна байыаннай-спортивнай күрэхтэһиилэргэ бастыҥ түмүктэри көрдөрөллөр. Үгүс үөрэнээччи араас айар бэстибээллэргэ уонна куонкурустарга гран-при аатын ылаттыыр. Педагогтар — РФ Бэрэсидьиэнин, СӨ Ил Дарханын гранын, идэни көрдөрөр куонкурустар  кыайыылаахтара. Устуоруйа уонна обществознание учуутала Роман Оконов “Сыл учуутала-2020” Бүтүн Арассыыйатааҕы куонкурус финалыгар Саха сирин аатыттан кыттыбыта.

Санатан эттэххэ, 2022 сылга “Үөрэх” национальнай бырайыак иитинэн, Дьокуускай куорат “Прометей” түөлбэтигэр өрөспүүбүлүкэҕэ саамай улахан — 990 миэстэлээх оскуола тутуллуоҕа. Ону тэҥэ, Уус Алдан улууһун Бороҕонугар 450 миэстэлээх уонна Кэбээйи улууһун Сайылыгар 275 миэстэлээх оскуолалары үлэҕэ киллэрэри былаанныыллар.

 

СӨ Ил Дарханын уонна СӨ Бырабыыталыстыбатын пресс-сулууспата.

Хаартыска: Мария ВАСИЛЬЕВА (СИА).

1
0