Уус Алдан улууһун Суотту нэһилиэгэр «Үөрэхтээһин» национальнай бырайыак чэрчитинэн 220 миэстэлээх таас оскуола тутулла турар.
Бүгүҥҥү күҥҥэ тутуу 75%-на бэлэм. Ахсынньыга сырдык ыраас оскуола дьиэтэ аһыллыахтаах. Оскуола дириэктэрэ Ирина Петухова иһитиннэрбитинэн, 160 миэстэлээх орто оскуола дьиэтэ 1975 сыллаахха тутуллан киирбит. Дьиэ эргэрэн, оҕолор атын-атын дьиэлэринэн тарҕанан үөрэнэ сылдьаллар. Ол курдук, 1-кы кылаастан 11 кылааска диэри 170 оҕо бу маннык усулуобуйаҕа тохсус сылын үөрэнэр.
Ирина Петухова бэлиэтииринэн, оскуола тыа хаһаайыстыбатын сайыннарыы хайысхатын тутуһан, «Кэскил» тыа хаһаайыстыбатын кэпирэтиибин үлэтин сүрүннүүр. Оскуола оҕолоро үөрэх сылыгар 30 ынаҕы көрөн, кыстыгы туораталлар уонна сайынын сайылыкка сайылаталлар.
Саҥа оскуолаҕа маны таһынан химия, физика уонна биология лабораториялара үлэлиэхтэрэ.
СИА.