Уус Алдан улууһун Суотту кулууба 2 сыл тоҥон туран баран, саҥа хочуолунай тутуллан, сылааһынан хааччыллан араас таһымнаах тэрээһиннэр буолуталаан эрэллэр.
Муус устар 25 күнүгэр «Нэһилиэкпит устуоруйата — дьон дьылҕатынан» диэн кэмпириэнсийэ Саха автономията тэриллибитэ 100 сылыгар ананан үрдүк таһымнаахтык ааста.
Кулууп аһыллыбытынан дуу, нэһилиэк устуоруйатын билээри дуу, дьон саалы толору муһунна. Кэмпириэнсийэ сүрүн сыалынан-соругунан Суотту нэһилиэгин уулуссалара ааттаммыт дьон кимин-тугун, олохторун-дьаһахтарын,тугу үлэлээбиттэрин, кэнники дьылҕаларын иҥэн-тоҥон билии, илдьиритэн ырытыы буолла.
Кэмпириэнсийэ Суотту нэһилиэгин бибилэтиэкэтин көҕүлээһинэн (салайааччы Р. Черкашина) тэрилиннэ.
Сергей Васильев аатын сүгэр Хоноҕордооҕу ситэтэ суох орто оскуола үөрэнээччилэрэ С. Васильев хоһооннорунан арыйдылар. Тута биһиги, суоттулар, киэн туттар бэйиэппит, уопсастыбаннай диэйэтэл С. С. Васильев олоҕун, үлэтин-хамнаһын туһунан ахтыыны Хоноҕор оскуолатын дириэктэрэ О. Горохова оҥордо.
Нэһилиэкпит ааспыт кэмин дьонун-сэргэтин үчүгэйдик билэр, аҕа саастаах убайдарбыт: С. Федоров, Д.Пермяков, Г. Портнягин, В. Заровняев хас биирдии сырдатар киһилэригэр үчүгэйдик бэлэмнэнэн кэлбиттэрэ дакылааттарыттан биллэр. Л. Охлопкова аҕатын туһунан амарахтык ахтыыта истээччилэри барыбытын да долгутта. Мин С.Г. Охлопков «Төлкө түстэниитэ» диэн кинигэтин төһө да хаста да аахтарбын, ааптар кыыһыттан ахтыыны эт кулгааҕынан истэр уратылаах эбит.
Дьэ, ити курдук үс чаастаах кэмпириэнсийэ бэрт интэриэһинэйдик ааста, билбэтэхпитин билэн, сэргэхсийэн тарҕастыбыт.
«Саха сирэ» хаһыакка, edersaas.ru cаайтка анаан Иннокентий ПОПОВ-ОҔУРУОТТААХ.