Суотту техникумун устудьуона ууттан киһини быыһаата

Ааптар: 
Бөлөххө киир:

Павел Владимиров Уус-Алдан улууһугар Суоттутааҕы техникумҥа «Защита в чрезвычайных ситуациях» идэтигэр 3 кууруска үөрэнэр.

Коронавирус дьаҥынан сибээстээн дьиэттэн үөрэх кэмигэр кини дойдутугар, Эдьигээҥҥэ сылдьан, биир дойдулааҕа ууга түспүтүн быыһаата. Хорсун-хоодуот быһыы ыксаллаах түгэҥҥэ оҥоһулларын, итиэннэ оннукка бэлэм дьону иитэн-такайан таһаарыыга анал үөрэхтээх исписэлиистэр үөрэтиилэрэ, иитиилэрэ ыкса сибээстээх. Онуоха Павел анал үөрэххэ үөрэнэ сылдьарын сэргэ, хорсун санаалааҕын көрдөрдө.

Павел соҕотох ийэ улахан оҕото. Бииргэ төрөөбүт иккиэлэр, бырааттаах. Үөрэҕэр кыһамньылаах, киһи быһыытынан сэмэй, эппиэтинэстээх, барыга-бары ылсан инники күөҥҥэ сылдьар, техникумун оҕолоругар холобур буолар устудьуон, ыстаарыста. Сылын ахсын ыытыллар «WorldSkills» күрэскэ идэтинэн ситиһиилээхтик кыттар, стендовай ытыыга “Манчаары оонньууларын» кыттыылааҕа диэн куратора Ньургустаана Ньургустановна билиһиннэрдэ.

Павел бэйэтэ кэпсииринэн,  сэтинньи 11 күнүгэр, Эдьигээҥҥэ убайдарын кытта өрүскэ балыктыы киирбиттэр. Өрүс саҥа туран эрэр кэмигэр мууска киһи хаама сылдьарын көрбүттэр. Чочумча буолаат, киһилэрэ муус анныгар барбыт. Павел ону көрөөт кэтэмэҕэйдии, толкуйдуу барбакка быыһыы ыстаммыт. Тэйиччи буранын хаалларан, мууска сыыллан киирэн киһини илиититтэн харбаан таһааран ууттан өрүһүйбүт. «Мин оннубар ким баҕарар маннык быһыыны оҥоруо этэ. Чыпчылҕан түгэҥҥэ бэйэ-бэйэҕэ өйөбүл, өйдөһүү уонна сэрэхтээх буолуу наада», — диэн кини санаатын үллэһиннэ.

Бэйэтин олоҕун кэрэйбэккэ, кутталтан чаҕыйбакка Павел Владимиров оҥорбут хорсун быһыыта атыттарга холобур буолар.

Улуус дьаһалтатын пресс-сулууспата,

Уус Алдан.

+1
0
+1
0
+1
0
+1
0
+1
0
+1
0
+1
0