СӨ Ил Дархана Айсен Николаев үлэтинэн Уус Алдан улууһугар сылдьан, Суоттуга саҥа оскуолаҕа ыалдьыттаата.
Бу «Үөрэх» национальнай бырайыагынан тутуллубут 220 миэстэлээх оскуола быйыл кыһын тохсунньуга үлэҕэ киирбитэ. Оҕолор бу иннинэ түөрт сиринэн үөрэнэ сылдьыбыттара. 1975 сыллааха тутуллубут хаарбах туруктаммыт оскуоланы тоҕус сыллааҕыта көтүрбүттэрэ.
Айсен Николаев оҕолорго уонна учууталларга истиҥ эҕэрдэтин тиэртэ.
—Аныгы кэм ирдэбилигэр эппиэттиир оскуоланы тутуу, сайдыыга сирдиир, — диэтэ кини. Оҕолор саҥа оскуолаларын харыстыылларыгар, билиигэ-көрүүгэ тардыһалларыгар, үүнэн-сайдан тахсалларыгар баҕарда. Билиилээх буоллахтарына кыайыы да кэлиэҕин эттэ. Ил Дархан дохсун ытыс тыаһыгар доҕуһуоллатан бу үөрүүлээх күн оскуолаҕа ПАЗ оптуобуһу ылалларыгар сэртипикээти туттарда.
Икки мэндиэмэннээх таас оскуолаҕа үөрэнэр кылаастары сэргэ анал лабораторнай хостор, мастарыскыайдар, лингафоннай мультимедийнай, үҥкүү хосторо, кэмпириэнсийэлиир саала, успуорт саалата, бибилэтиэкэ, 78 миэстэлээх эбиэттиир саала бааллар. Онтон оскуола таһыгар футболлуур сир, сүүрэр дорожка, успуорт былаһаакката болҕомтону тардаллар. Оскуолаҕа «Точка роста» сыыппара уонна гуманитарнай хайысхалар киинэ, үөрэх цифровой эйгэтэ тэриллибиттэр.
Уон биир кылаастаах Суотту орто оскуолатыгар билигин 178 оҕо үөрэнэр. Кэнники биэс сылга оҕолор Бүтүн Арассыыйатааҕы араас тэрээһиннэргэ ситиһиилээхтик кытталлар, сыллата судаарыстыбаннай олимпиадалар эрэгийиэннээҕи түһүмэхтэрин финалистарынан буолаллар.
Үөрүүлээх тэрээһиҥҥэ инники былааннарын сырдаттылар, саҥа оскуолаларын көрдөрдүлэр.