Уус Алдан Суоттутугар 220 миэстэлээх таас оскуола тутуута 2021 сылга түмүктэниэҕэ.
edersaas.ru
Бу туһунан Бырабыыталыстыба бэрэссэдээтэлэ Владимир Солодов Суоттуга саҥа оскуола тутуллар сирин көрөн баран эттэ. Бүгүҥҥү күҥҥэ таас оскуола тутуллуохтаах сиригэр таас сыбаайалар тураллар.
Нэһилиэк баһылыга Василий Иванов оскуола кыһалҕатын бу курдук билиһиннэрдэ:
— 2013 сыллаахха 125 миэстэлээх мас оскуола хаарбах туруктааҕыттан саахалланар кутталламмыта. Ол курдук, ол сыл буолбут улахан халаан содулуттан дьиэ акылаата хамнаан, өһүөтэ сууллан түспүтэ. Онно өрөспүүбүлүкэттэн анал хамыыһыйа үлэлээн, дьиэ сууллар кутталламмытын туһунан докумуон толорон, эргэ оскуолабытын көтүрбүппүт. Оскуолабыт хайысхата агрооскуола буолан, аттыгар эбии дьарыктанар хас да эбийиэги туппуппут. Хата, билигин биһигини ол эбийиэктэр «быыһаан» тураллар. Ол курдук, иистэнэр мастарыскыай, үөрэх производственнай дьиэтин (үүнээйи олордор дьиэ), эргэ интэринээти саҥардан туппатахпыт буоллар, оҕолор үөрэнэр сирдэрэ суох буолуо этэ. Саҥа оскуола сыбаайата түспүт сиригэр эргэ оскуола аттыгар турбут эбийиэктэр матырыйаалларын көтүрэн онно көһөрөн илдьэн тутан, билигин алын сүһүөх кылаас оҕолоро үөрэнэр дьиэлээхтэр. Нэһилиэкпит спортивнай саалалаах этэ.. Ол сааланы оскуолаҕа биэрбиппит. Инньэ гынан, сорох кылаастар онно үөрэнэллэр.
Быйыл 12 кылааска 195 оҕо үөрэнэр. Үөрэх тэрилтэтин саҥа дьиэтэ 220 оҕоҕо анаан тутуллар. Оскуолабыт суох буолан, оҕо үксэ онно-манна тарҕаспыта. Үөрэх саҥа дьиэтэ үлэҕэ киирдэҕинэ, оҕолор оскуолаларыгар төттөрү кэлиэхтэрэ.
Оҕо спортивнай оскуолатыгар араас улуустартан кэлэн үөрэнэллэр. Саҥа оскуола тутулуннаҕына, биһиэхэ өссө элбэх оҕо үөрэнэ кэлиэҕэ.
Оскуолабыт тутуутун боппуруоһугар алта сылы быһа туруулаһан үлэлэстибит. Биһиги оскуолабыт туһунан бырабыыталыстыба салайааччыта эрдэттэн истэн-билэн кэлбит. Онон премьер-миниистир Владимир Солодов сарсыарда кинини биэрэккэ көрсүөхпүттэн ыла, улуус киинигэр түмүктүүр мунньахха тиийэ: «Икки сылынан Суоттуга оскуола хайаан да үлэҕэ киириэҕэ», — диэн эрэннэрдэ, — диэн кэпсиир Суотту нэһилиэгин баһылыга Василий Иванов.
Улуус баһылыга Алексей Федотов уонна Ил Түмэн дьокутааттара Суотту улуус биир бөдөҥ, оройуон социальнай экономическай сайдыытыгар сүрүн стратегическай суолталаах нэһилиэк буоларын бэлиэтээтилэр. Нэһилиэк үс сэлиэнньэни: Оҕуруоттааҕы, Хоноҕору, Саһылыкааны хабар. Онон манна таас оскуола тутуллуута — кэм ирдэбилэ. Нэһилиэккэ сыл аайы оҕо төрөөһүнэ элбии турар. Ол туоһутунан кэлиҥҥи сылларга балаҕан ыйын 1-кы күнүгэр бастакы кылааска 20-чэлии оҕо киирэр. Онон оскуола оҕотун ахсаана элбээн иһэр эбит.
Балаһыанньаны ыкса билсэн баран Бырабыыталыстыба бэрэссэдээтэлэ Владимир Солодов:
— Бу күннэргэ бэдэрээтчити быһаарыыга куонкурус биллэриллиэҕэ. Тутуу болдьоҕор түмүктэнэрин хонтуруоллуохпут, — диэн бэлиэтээтэ.
Оскуола бырайыага 2016 с. оҥоһуллубут. Бу аныгы ирдэбилинэн тутуллубут оскуола үйэлэри ситимниэҕэ.
Онон суоттулар икки сылынан үлэҕэ киириэхтээх оскуолаларын эрэнэ кэтэһэллэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.