Кулун тутар 1-4 күннэригэр Саха сиригэр XV Дьахталлар сийиэстэрэ буола турар. 500 дэлэгээт онлайн көрүҥүнэн уонна бэйэлэрэ кэлэн, сийиэс үлэтигэр көхтөөхтүк кытталлар. Ону тэҥэ, атын эрэгийиэннэртэн ыалдьыттар бааллар. Дэлэгээттэр бэйэлэрин санааларын үллэстэллэр.
Суорумньуһуттар. Хаҥастан үһүс — Арчылаана Егорова.
“Арчылаана” суорумньу кулуубун салайааччы Арчылаана Егорова “Демография” сессияҕа кэлэн, бэйэтин уопутун үллэһиннэ.
— Суорумньу үгэһэ биһиги өбүгэлэрбитигэр былыр-былыргыттан баар. Алаастарынан ыраах-ыраах олорор буолан, эдэрдэри ыал оҥортуурга анаан үлэлиир суорумньулар бааллара. Аймах хаана булкуспатын туһуттан, төрүччүлэри үчүгэйдик үөрэтэллэрэ.
Билиҥҥи кэмҥэ ыал буолбакка хаалар дьон элбэҕинэн сибээстээн, бу кыһалҕа сытыытык турар. Бүтүн норуот кыһалҕата буолла диэтэхпинэ, сыыспаппын. Манна судаарыстыба, уопсастыба болҕомтотун ууруохтаах дии саныыбын. Урут дьиэ кэргэн, оҕо-аймах дьыалаларыгар кэмитиэт баар эрдэҕинэ, сүрдээҕин өйөөн, хамсааһын тахсан, суорумньу кулууптара элбии сылдьыбыттара. Өрөспүүбүлүкэтээҕи суорумньу ыһыахтара ыытыллаллара, суорумньу кулууптарыгар граннары биэрэллэрэ.
Мин суорумньунан 2007 сылтан дьарыктанабын, быйыл 15 сылын туолар. Бу кэм устата 155 паара холбоһон, 40 оҕо төрөөтө. Ол иһигэр, дойдубар Намҥа үлэлээн, улуустан 97 киһи ыал буолбута. Үксүгэр 40 саастарын ааспыт дьон миэхэ кэлэллэр. Илин эҥээр улуустарыгар холостуой эр дьон элбэх, тоҕо диэтэр, оһоҕунан оттуллар дьиэлээх, хаһаайыстыбалаах буолан, ханна да сылдьыбаттар, кырдьаҕас төрөппүттэрин көрөн олороллор. Кинилэргэ көмө наада.
“Арчылаана” кулууп сыл аайы суорумньу ыһыахтарын, билсиһии киэһэлэрин, Саҥа дьыллааҕы баал-маскарааты, улуустарынан айаннары тэрийэр этибит. Билигин пандемия буолан, биллэн турар, көрсүһэргэ харгыстар бааллар, үксүн төлөпүөнүнэн үлэлиибит. 10 улууска сылдьан, үлэлээбиппит. Дьокуускай куоракка көрсүһүүлэри, тэрээһиннэри ыытар сирдээхпит, дьиэлээхпит буоллар диэн баҕа санаалаахпын, — диэн кини этэр.
Ангелина Васильева, “Саха сирэ” хаһыат, edersaas.ru