Дьааҥыга күүстээх ардахтан Суордаах таһыгар Дулҕалаах өрүс уутун таһыма үрдээн нэһилиэнньэни ыксатта.
Дьиэлэрэ ууга барбыт дьону Суордаахтан улуус киинигэр уонна Дьокуускайга аҕалыы ыытыллар. Бастакы көппүт салгын аала нэһилиэнньэлээх пууҥҥа тиийэн, 12 киһини ылла. Салгыы хаалбыт дьону ыла бөртөлүөт хаста да кырыныаҕа. Бу туһунан ааспыт түүҥҥэ ыытыллыбыт суһал ыстаап мунньаҕар СӨ Бырабыыталыстыба бэрэссэдээтэлин бастакы солбуйааччы Дмитрий Садовников иһитиннэрдэ.
Санатар буоллахха, Дьааҥы улууһугар ыксаллаах быһыы-майгы биллэриллибитэ. Аһара ардаабытын түмүгэр, Дулҕалаах, Сартаҥ уонна Адыаччы үрэхтэргэ уу олус таһымнаан таҕыста. От ыйын 9 күнүгэр Суордаахха Дулҕалаах үрэххэ уу эмискэ кэлэн, 88 чааһынай дьиэни ылан олохтоохторо ыксатта. Нэһилиэккэ 300-тэн тахса киһи олорор, 5 социальнай эбийиэк баар.
«Полярные авиалинии» хампаанньа бөртөлүөтэ Баатаҕайтан 5 быыһааччылаах тиийэн, бастакы 12 киһи киһини ылла. Хаалбыт дьону эмиэ көһөрөн, улуус киинигэр уонна Дьокуускай куоракка аҕалыахтара. Баатаҕайга икки бөртөлүөт баар. Бүгүн сарсыарда үһүс көтөр аал быһааччылардаах уонна оробуочай бөлөххө киирбит исписэлиистэри илдьэ көттө.
Билигин анал хамыыһыйа тэриллэн, төһө хоромньу тахсыбытын ааҕыы саҕаланна. «Хоромньу олус улахан. Аҥаардас чааһынай эрэ дьиэлэр буолбакка, социальнай эбийиэктэр уонна тыа хаһаайыстыбатыгар сыһыаннаах сир-уот эмсэҕэлээтэ. Нэһилиэнньэҕэ бары өттүнэн матырыйаалынай көмө толору оҥоһуллуоҕа», — Дмитрий Садовников быһаарда. Итини тэҥэ, Дмитрий Дмитриевич СӨ Үөрэҕин министиэристибэтэ бу күннэргэ суһаллык Суордаах оҕолорун сайыҥҥы лааҕырынан хааччыйарыгар сорудахтаата.