Суордаахха хоромньуну ааҕа хамыыһыйа тиийдэ. Халааҥҥа түбэспит Дьааҥы улууһун Суордаах нэһилиэгин дьаһалтатын баһылыга Владимир Стручков иһитиннэрбитинэн, Суордаахха 409 киһи бырапыыскалаах, онтон дьиҥнээҕинэн 329 киһи олорор.
Оскуолаҕа үөрэнэр, дьыссаакка сылдьар оҕо ахсаана – 78. Бэҕэһээ 10 киһилээх бөлөх Дьокуускайтан тиийдэ. Кинилэр араас министиэристибэлэртэн – СӨ ОДьКХ уонна энергетика, СӨ Тутууга, СӨ Доруобуйа харыстабылыгар, СӨ Үөрэххэ уо.д.а. министиэристибэлэртэн, биэдэмистибэлэртэн. Бу тиийбит бөлөх Суордаахха халаан түмүгэр тахсыбыт хоромньуну ааҕыахтара.
Хоромньуну ааҕыыны түргэнник ыытарга СӨ Ил Дархана Айсен Николаев сорудахтаабыта.
Бөтөҥкөскө уу түстэҕинэ мунньахтыахтара
Адыаччы нэһилиэгин баһылыга Иннокентий Петрович Юмшанов төһө даҕаны солото суох, ыгымнык сырыттар бүгүн (от ыйын 13 күнүнээҕи) маннык иһитиннэрдэ:
— Бөтөҥкөс сэлиэнньэтэ, билэргит курдук, ууга баран олорор. Уубут кыралаан түһэр эрэр. 2 чааска – 1 см курдук. Тиэргэннэрбит барыта сүүс бырыһыан ууга барбыттара. Онон оҕолору куоракка лааҕырга ыытаары сылдьабыт. Бүгүн ардах халааныттан тахсыбыт хоромньуну ааҕыыга Дьокуускайтан кэлбит анал хамыыһыйа Суордаахха үлэлээн эрэр дииллэр. Онтон Дулҕалаахха кэлиэхтээхтэр. Быһата, нэһилиэктэр ууга барбыт уочараттарынан диэххэ сөп. Биһиги уубут түстэҕинэ нэһилиэк олохтоохторун түмэн, мунньахтыахпыт. Онно тахсыбыт хоромньуларын толуйууга туох ирдэнэр докумуоннар наадаларын эҥин, чөлүгэр түһэрэр үлэлэр тустарынан кэпсэтиэхпит. Нэһилиэкпитигэр 921 киһи бырапыыскалаах. Таарыйа аҕыннахха, халаан кэмигэр сибээспит, уоппут барбакка абыраата. Уопсайынан, ити өттүгэр туһааннаах сулууспалар үчүгэйдик үлэлээтилэр.
Бэлэмнээтэ Женни Стрюкова
Хаартыска: СИА-тан