Дьааҥы оройуонун баһылыгын солбуйааччы Дмитрий Габышев: нэһилиэнньэ эмсэҕэлээбэтэ, сүөһү-ас этэҥҥэ.
Дьааҥыга күүстээх ардахтан Суордаах таһыгар Дулҕалаах өрүс уутун таһыма үрдээбитэ. Оройуон баһылыгын солбуйааччы Дмитрий Михайлович Габышев иһитиннэрбитинэн, бэҕэһээ ыксаллаах быһыы-майгы хамыыһыйатын (КЧС) мунньаҕар Суордаах нэһилиэгэр ыксаллаах быһыы-майгы эрэсиимин биллэрэр туһунан быһаарыыны ылыммыттар. Ол кэмҥэ уу муҥутуур таһымҥа тиийэ илик эбит. Нэһилиэнньэҕэ сэрэтэр үлэни саҕалаабыттар.
—Нэһилиэк оскуолатын спортивнай саалатыгар дьону быстах кэмҥэ түһэрэр пуун кэмигэр тэриллибит, — диэн этэр Дмитрий Михайлович. Оройуон баһылыгын солбуйааччы дааннайынан, билиҥҥи кэмҥэ 32 тиэргэҥҥэ уу киирбит, итинтэн 10 дьиэ. «Эмсэҕэлээһин, суһал уонна да атын көмөҕө наадыйыы суох, сүөһү-ас этэҥҥэ».
Дьааҥы оройуонун дьаһалтатыгар баһылык Г.И.Чириков уонна Суордаах нэһилиэгин баһылыга В.П.Стручков салайааччылардаах хонугу эргиччи үлэлиир суһал ыстааптар тэриллибиттэр. КЧС уонна ОБП суһал мунньаҕар хоромньуну ааҕарга хамыыһыйа тэриллибит.
Оройуон дьаһалтата Сартаҥҥа уонна Адыаччыга үрдүк бэлэмнээх буолуу эрэсиимин биллэрбит.
+1
+1
+1
+1
+1
+1
+1