Тыйаатыр оптуобуһа туох төрүөттэн умайбытын быһаара сатыыллар.
Александр ТАРАСОВ, https://edersaas.ru
Бэҕэһээ киэһэ 9 чаас саҕана Ньурба улууһун көһө сылдьар драматическай тыйаатырын оптуобуһа Горнай улууһун Маҕараһын аттыгар умайбыта.
Ньургуйаана Федорова, СӨ Ыксаллаах быһыыга-майгыга министиэристибэтин Горнайдааҕы бэрэбиэркэлиир уонна профилактикаҕа үлэҕэ салаатын үлэһитэ:
— Оптуобус умайбыт төрүөтүн быһаара сылдьабыт. Ирдэбил быһыытынан үс суукка иһинэн быһаарыахтаахпыт. Суоппар этэринэн, баһаар мотуортан саҕаламмыт.
* * *
Ньурба тыйаатырын үлэһиттэрэ этэллэринэн, оптуобус баһаарыгар «Тыгын Дархан» киинэҕэ уһуллуохтаах көстүүмнэрэ уонна бэйэлэрин маллара-саллара, докумуоннара былдьаммыт. Санатар буоллахха, быйыл сайын Ньурба Куочайыгар киинэҕэ анаан ыһыах эпизодун устуу буолуохтаах этэ.
Тыйаатыр артыыстара олунньу 24 күнүгэр «Кыһыл көмүс мааска» киинэ бэстибээлигэр кытта барыахтаахтар. Пааспардарын оннугар быстах кэмҥэ туһаныллар анал докумуон оҥоһуллуоҕа. Москваҕа бэстибээлгэ кытта бараллара тохтообот.
Александр ТАРАСОВ, https://edersaas.ru