Сүрүн Уопсастыба

Суолу баттаһа ас-үөл тиэрдиллиэҕэ

Кыһыҥҥы массыына суола сабыллыан иннинэ мөлтөх суоллаах-иистээх уонна тэйиччи сытар Саха сирин нэһилиэктэрэ ас-үөл уонна социальнай туттар табаардарынан 2022 сыл уу суола аһыллыар диэри хааччыллыахтаахтар. Маннык соругу бырабыыталыстыба уонна өрөспүүбүлүкэтээҕи ыстаап иннигэр Саха сирин баһылыга Айсен Николаев туруорда, диэн Ил Дархан уонна бырабыыталыстыба пресс-сулууспата иһитиннэрэр.

“Бүгүн бырабыыталыстыба уонна өрөспүүбүлүкэтээҕи суһал ыстаап дьоһун сорудахтарынан аһы-үөлү тимир суолунан быыстала суох тиэрдии уонна кыһыҥҥы массыына суолун сөптөөхтүк көрүү-истии буолар. Биир даҕаны нэһилиэнньэлээх пуун аһа-үөлэ суох хаалыа суохтаах”, — диэн Айсен Николаев бэлиэтээтэ.

Суһал ыстаап мунньаҕар өрөспүүбүлүкэ баһылыга өрөбүл күннэргэ кууһунан уонна биирдиилээн атыылыыр эргиэн тэрилтэлэрин дезинфекцияҕа сабыы ирдэбилин тохтоторго соруйда. Ол эрээри тэрилтэлэр мааска эрэсиимин уонна социальнай тэйиччи туттан турууну, дьиэлэрин-уоттарын обработкалааһыны тутуһуохтаахтар.

Сыана үрдээһинин кытта сибээстээх дьон үҥсүүтэ аҕыйаабыт эрээри, маннык түгэн син-биир тахсар. Саха сирин Сыанаҕа госкэмитиэтин иһитиннэриитинэн, сууккаҕа 30 маннык үҥсүү киирэрин борокуратуураны кытта бииргэ көрөллөр.

ФАС  Саха сиринээҕи управлениета аптекаларга эмп сыанатын хонтуруоллуоҕа.

Өрөспүүбүлүкэҕөэ күннэтэ ас-үөл уонна атын табаар төһө саппааһа баарын кэтээн көрөллөр.

СӨ Бырабыыталыстыбатын вице-премьерэ Михаил Никифоров иһитиннэрэринэн, “Саха сирин тимир суоллара” АУо 2025 богуона айаннаан иһэр, итинтэн Аллараа Бэстээх ыстаансыйатыгар – 1413 богуон.

Аллараа Бэстээххэ билигин 386 богуон таһаҕастаах турар, бэҕэһээ итинтэн 122 сүөкэннэ.

СИА

Бэлэмнээтэ Женни Стрюкова

Хаартыска: СИА

0
0
Telegram Whatsapp