РФ бырабыыталыстыбатын хаһаас пуондатыттан Саха сирин суолларын оҥорууга эбии 2,7 млрд солкуобай көрүллүөҕэ. Бу туһунан Ил Дархан Айсен Николаев премьер-миниистир Михаил Мишустины кытары Дьокуускайга буолбут көрсүһүүлэригэр кэпсэтэн турар.
Бу туһунан РФ бырабыыталыстыбатын дьаһала атырдьах ыйын 19 күнүгэр таҕыста. Дьаһалга этиллэринэн эбии үбүлээһин тутуу матырыйаалларыгар сыана үрдээбитинэн көрүллүбүт.
Ил Дархан Айсен Николаев иһитиннэрбитинэн, быйыл өрөспүүбүлүкэ үрдүнэн барыта 254 км эрэгийиэннээҕи суол, 35 км Дьокуускай куорат суола оҥоһуллуохтаах. Ону таһынан “Халыма”, “Лена” федеральнай суолларга эбии үбүлээһин көрүллүбүт.
– Эрэгийиэннээҕи суоллары оҥорууга барыта 6,5 млрд солкуобай наада. Федеральнай киин эбии үбүлээһини кэмигэр көрбүтүн түмүгэр суолларбыт быйыл оҥоһуллан киириэхтэрэ, – диэн бэлиэтиир Айсен Сергеевич.
Аграфена КУЗЬМИНА