Тимир көлөлөөх дьон билиитигэр. Ааспыт 2016 сылга суолга сэрэхтээх буолууга сыһыаннаах сокуоннарга туох сүрүн уларыйыылар киирбиттэрин санатабыт.
Вера МАКАРОВА, «Саха сирэ» хаһыат, https://edersaas.ru/
Бастакытынан, сорох ыстарааптарга 20 күн иһинэн төлүүр түгэҥҥэ, ыстараап уопсай ахсааныттан аҥаарын эрэ төлүөххэ сөп.
Иккиһинэн, ыстараабы кэмигэр төлөөбөтөх киһи, ыстарааба 10 тыһ. солк. сууматтан тахсыбыт буоллаҕына, суут приставтара бу киһи массыынанан сылдьарын боборго туспа уураах таһаараллар уонна ГАИ базатыгар киллэттэрэллэр.
Маннык иэстээх сылдьан түбэспит киһи РФ Административнай кодексатын 17.17-с ыстатыйатынан, массыына ыытар бырааба 1 сылга диэри болдьохо быһыллыан сөп, эбэтэр 50 чаас кыһалаҥ үлэҕэ ананыан сөп. Ааспыт сылга маннык уурааҕынан, 50-ча киһи миэрэҕэ тардыллыбыт.
Өссө биир улахан уларыйыынан массыына ыытар быраабы ылар эксээмэн туһунан буолар.
Манна теоретическэй өттүгэр биир сыыһаны оҥордохторуна эбии ыйытыктар киирэн биэрбиттэрэ. Былаһаакка иһигэр урут 3 көрүҥ дьарыгы көрдөрөр эбит буоллахтарына, ол эбиллэн 5 буолбута уонна суолга сылдьыыга хас биирдии сыыһа оҥоһуллуннаҕына, онно сөптөөх сыана туруоруллар.
Оттон бу сылтан массыынаны оҥорор собуоттарга туспа саҥа ирдэбил киирдэ. Ол — хас биирдии массыынаҕа хайаан да “Эра-глонасс” диэн анал прибор туруохтаах.
Бу прибор суолга ол-бу тахсар түгэнигэр, анал сулууспаны суһаллык ыҥырарга, ханна баар сиргин чопчулуурга ананар. Бу тэрил омук дойдутуттан киирэр эргэ массыыналарга эмиэ баар буолуохтаах. Онтуката суох таможня үлэһиттэрэ массыынаҕа пааспар биэрбэттэр.
Сатаан туһаннахха, биир олус туһалаах уонна барыстаах уларыйыынан интернет ситимин нөҥүө массыына регистрацията уонна быраабы ылыы буолар. Ол эбэтэр “Госуслуги.ру» портал (www.gosuslugi.ru.) нөҥүө суруттаран уочараттаабыт киһи госпошлина төлөбүрүгэр 30% чэпчэтиини ылар.
Уонна бу 2017 сыл олунньу 1 күнүттэн болдьоҕо бүппүт, сүппүт, эбэтэр кыраныысса таһыгар сылдьар массыына быраабын элбэх өҥөнү оҥорор кииннэр нөҥүө ылыахха сөп.
ГИБДД управлениетын пропагандаҕа отдела.
Хаартыска: УГИБДД пропагандаҕа отдела.