Киһи эчэйиилээх уонна өлүүлээх саахалы таһааран баран, куотан хаалбыт суоппардарга накаастабыл кытаатта. Бу туһунан сокуон барылын Госдуума бүтэһиктээх, үһүс ааҕыытыгар ылынна. Онон маннык түгэҥҥэ накаастабыл арыгыны иһэн, эбэтэр наркотигы туһанан баран, саахалы таһаарбыт буруйга тэҥнэстэ.
Сокуон 264-с ыстатыйа 2, 4, 6 пууннарыгар уларытыылары киллэрэр. Суоппар киһи эчэйиилээх саахал буолбут сириттэн куотан хааллаҕына, 4 сылга көҥүлэ быһыллар, киһи өлбүт буоллаҕына — 2-7 сылга, иккиттэн элбэх киһи өллөҕүнэ – 4-9 сылга хаайыллыан сөп.
Билиҥҥи туругунан, маннык “куоппут” суоппарга массыына ыытар бырааба 1-1,5 сылга быһыллар, эбэтэр административнай эппиэтинэһи сүгэн, 15 эрэ сууккаҕа хаайыллар. Ол эбэтэр, кинилэр саахал буолбут сиригэр хаалан, арыгыга тест туттарбыт суоппардааҕар, кыра эппиэтинэһи сүгэллэр. Онон сокуон кытааппыта тута биллэр, аны холуобунай дьыалаҕа эппиэттииллэр. Бу миэрэ суолга куттала суох буолууга туһуланар.
Ангелина Васильева, “Саха сирэ” хаһыат, edersaas.ru
+1
+1
+1
+1
+1
+1
+1