Алтынньы 23 күнүгэр Кэбээйигэ күүттэриилээх суол арыллар.
Кэбээйи улууһун Сэбээн Күөл нэһилиэгин дьокутааттарын Сэбиэтин бэрэссэдээтэлэ Таисия Кейметинова: “Бу бүтүн Кэбээйи улууһугар, биллэн турар, улахан үөрүүлээх быһыы-майгы буолар. Сайыннары бадарааҥҥа батыллар, ардахха-хаарга алдьанар-кээһэнэр суолбут дьэ оҥоһуллан киирэрэ бу суолу бата олорор нэһилиэктэргэ олус үчүгэй. Хомойуох иһин, биһиги нэһилиэкпит онно хапсыбат. Дьиҥэр, биһиэхэ да суолу тэлэр кыах баар. Бу сайын оҕолору, ыччаттары мунньан, эспэдииссийэ тэрийэн суол оҥоһуллуон сөптөөх сиринэн сатыы барбыппыт. Түөрт хонугунан аналлаах сирбитин булбуппут. Манна көстөрүнэн, үс-түөрт эрэ сиринэн соччото суох учаастактар бааллар. Манна сир баайын хостооччулары кыттыһыннарыахха баар эбит дии саныыбыт”, — санаатын үллэстэр.
Таисия Васильевна этэринэн, суол суоҕа пандемия кэмигэр кэккэ ыарахаттары аҕалбыт. Ол курдук, билиҥҥи туругунан нэһилиэктэн 39 киһи Дьокуускай куоракка хаайтара сытар. Араас усулуобуйанан сөмөлүөт көппөккө, дьиэлэригэр барар кыахтара суох.
«Дьокуускайтан кыһыл оҕо төрөөн баран кэлбэтэҕэ биир ый буолла. Дьонноро ыксаан дьиэ куортамнаан олороохтууллар. Маны сэргэ биир киһи эпэрээссийэлэнэ тиийэн баран эмиэ хаайтаран хаалла. Итиэннэ устудьуон ыччаттарбыт дистанционнай үөрэххэ көһөннөр, дойдуларыгар кэлиэхтэрин баҕараллар. Барыларыгар уопсай биэрбэттэр. Онон Кэбээйигэ кэлэллэрэ оруннаах курдук», — диэн дьокутаат этэр.
Таисия Кейметинова: “Бырабыыталыстыба дьон туһугар элбэх үлэни ыытар. Суол оҥоруута – чахчы олохтоохтор тыын суолталаах боппуруостарын, үгүс кыһалҕатын быһаарара чуолкай. Онон инникитин бу күннэтэ көрсөр кыһалҕаларга көмөлөһөллөрө буоллар диэн баҕа санаабын тиэрдэбин”.
Ирина Ханды, “Саха сирэ” хаһыат, edersaas.ru