Сунтаар улууһугар ууну ыраастыыр ыстаансыйалаах, уунан хааччыйар ситимнэрдээх “уу заборун” бастакы сыбаайатын түһэрдилэр. Бу эбийиэк 10 тыһыынчаттан тахса нэһилиэнньэлээх улуус киинин ыраас уунан хааччыйыаҕа.
Олох-дьаһах хаһаайыстыбатын уонна энэргиэтикэ министиэристибэтэ иһитиннэрбитинэн, “уу забора” сууккаҕа 500м3 ууну биэриэхтээх, оттон ыстаансыйа – сууккаҕа 1100м3 ууну ыраастыыр кыахтаах. Ону тэҥэ, манна 3,5 килэмиэтир уһуннаах уунан хааччыйар ситими тардыахтара.
Бу бырайыак “Олорор дьиэ уонна куорат эйгэтэ” национальнай бырайыак “Ыраас уу” бырагырааматын чэрчитинэн олоххо киириэҕэ. Манна “Водоканал” АУо сакаасчыт, «ИнвестДорСтрой» тэрилтэ бэдэрээтчит быһыытынан үлэлииллэр.
Санатан эттэххэ, бу маннык бырайыагынан Горнай, Хаҥалас, Өлүөхүмэ, Амма, Үөһээ Бүлүү улуустарыгар 8 эбийиэк тутуллар турар. Быйыл биэс эбийиэк киириэҕэ, эһиил – үс.
Оттон былырыын Покрповскай куоракка бу бырайыагынан ууну ыраастыыр эбийиэк тутуллан киирэн, 9,5 тыһыынча киһи олорор куорат бары дьиэлэрин уонна социальнай эбиийэктэрин хааччыйар. 2021 сыл олунньутугар Өлүөхүмэ куоратыгар ууну ыраастыыр ыстаансыйа, аныгы хочуолунай тутуллубуттара уонна “уу забора” саҥардыллыбыта.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru