Бу күннэргэ Устье нэһилиэгиттэн 10 килэмиэтир тэйиччи сиргэ ойуур баһаара турбута бэлиэтэнэр.
edersaas.ru
Баһаар нэһилиэктэн балай да ыраах буолан нэһилиэнньэлээх пууннарга уонна социальнай-экэнэмиичэскэй эбийиэктэргэ кутталы суоһаабаттар диэн айылҕа харыстабылын кэтээн көрөр салаатын үлэһиттэрэ иһитиннэрэллэр. Уот салгыы өрө барбатын диэн, билигин үлэ ыытыллар, территорияны күүскэ маныыллар.
Улуустааҕы ыксаллаах быһыы-майгы хамыыһыйатын чилиэттэрэ Сунтаар улууһун Аҕа баһылыга Анатолий Григорьев, улуус баһылыгын бастакы солбуйааччыта Николай Александров, Устье нэһилиэгин баһылыга Александр Попов, Күндэйэ нэһилиэгин баһылыга Иван Константинов, ыксаллаах быһыы-майгы инфраструктуратын салаата уонна айылҕа харыстабылын инспекцията суһал бөлөх тэрийэн, дьону түмэ тардан, уоту умуруорар тэриллэринэн уонна ону таһынан улахан техниканан хааччыйан, ойуур уотун умуруорууга үлэ ыыталлар. Билигин ойуур баһаарын умуруорууга 57 киһи, 1 трактор, 1 вездеход, «Айан суол” уонна “РНГ” тэрилтэлэртэн бульдозердар, ону таһынан “РНГ” тэрилтэттэн водовоз үлэлиир.
«Сунтаар улууhа (оройуона)» муниципальнай оройуон дьаһалтатын пресс-сулууспата