«Патриот» өрөспүүбүлүкэтээҕи уопсастыбаннай хамсааһын быйыл сэттис сылын Сунтаар улууһугар «Патриот» (уруккута «Зарница») байыаннай-спортивнай оонньууну ыытар. Байыаннай-спортивнай тэрээһини уопсастыба (бэрэссэдээтэл РФ юстициятын сүбэһитэ, юстиция полковнига, СӨ үтүөлээх юриһа Михаил Люй Ден) сыл аайы Аҕа дойду Улуу сэриитин бэтэрээннэрин чиэһигэр аныыр.
Бастакы спортивнай оонньуу 2013 с. буойун-учуутал, САССР үтүөлээх учуутала, Аҕа дойду Улуу сэриитин бэтэрээнэ, «Кыһыл Сулус», «Аҕа дойду Улуу сэриитин» I истиэпэннээх уордьаннарын кавалера Иван Яковлев аатынан этэ. Спортивнай оонньуу Иван Макарович начаалынай байыаннай бэлэмнэниини уопсай үөрэхтээһин оскуолаларыгар ыытар туһунан санаатын олоххо киллэрэр соруктаах тэриллибитэ.
Онтон быйыл Сунтаар улууһун Күүкэй с. кулун тутар 30 күнүттэн саҕаланар байыаннай-спортивнай оонньуу Аҕа дойду Улуу сэриитин бэтэрээнэ, ССРС норуотун үөрэҕириитин туйгуна, САССР үтүөлээх учуутала, Сунтаар улууһун уонна Кутана нэһилиэгин бочуоттаах олохтооҕо Василий Александров чиэһигэр тэриллэр. 93 саастаах Василий Ефремович Дьокуускайга олорор. Быйылгы «Патриот» биир сүрүн уратытынан Бүлүү бөлөх түөрт улууһуттан (Сунтаар, Бүлүү, Үөһээ Бүлүү, Ньурба) биирдии хамаанда кэлэрэ былааннанар. Кинилэр байыаннай үөрэххэ кыттан, үөрүйэхтэнэн, инникитин аны бэйэлэрин улуустарыгар патриотическай иитии дьаһалларын ыытыахтара турдаҕа. Манна даҕатан эттэххэ, 2013 с. уонна 2016 с. салайааччы Михаил Сергеевич биир санаалаахтарын кытары оскуолаҕа байыаннай бэлэмнэнии (ОБЖ эрэ чааһын курдук буолбакка) предмет быһыытынан киирэрин курдук үөрэнээччилэр Ыҥырыы таһааралларын ситиспиттэрэ.
Бэрэссэдээтэли солбуйааччы Зинаида Игнатьева иһитиннэрбитинэн, кэнники кэмҥэ умнуллубут байыаннай үөрэҕи – оонньууну сөргүтэн, киэҥ хабааннаахтык ыытыы ыччаты патриотическай тыыҥҥа иитиигэ улахан оруоллаах. Ону сэргэ, бэтэрээннэр оҕолоро, сиэннэрэ, кинилэр биир саастыылаахтара дьоруойдар олохторун туһунан элбэҕи билэллэригэр көмөлөһөр.
Өссө биир сонунунан быйылгы «Патриот» байыаннай оонньууну анаан-минээн көрө-истэ, сырдата РФ Оборонаҕа министиэристибэтин «Красная звезда» хаһыатын Арҕааҥы байыаннай уокурукка анал кэрэспэдьиэнэ, иккис рангалаах хапытаан Константин Лобков кэлбитэ буолар. Михаил Люй Ден Константин Александровиһы кытары номнуо төрдүс сылын сибээстэһэр, бииргэ үлэлиир.
Кэрэхсэбиллэээҕэ диэн, «патриоттар» үлэлэрин үөрүйэҕин үллэстэр, кэпсиир икки кинигэ күн сирин көрдө. Олортон биирдэстэринэн Василий Александров төрөөбүт дойдутуттан Дьоҥкуодума күөлүттэн дойдуларын көмүскүү барбыт хорсун буойуттар тустарынан кинигэ буолар. «Дьоҥкуодумалар – дойду көмүскэлигэр» кинигэни Василий Ефремович кыыһа Нина Васильевна үбүлээн таһаартарда.
Онон, «патриоттар» Сунтаар улууһун эдэр байыастарыгар, ыччаттарыгар кинигэ кэһиилээх, ыраахтан-чугастан ыалдьыттардаах айаннаан эрэллэр.
ЫСПЫРААПКА
«Патриот» байыаннай-спортивнай оонньуу маннык бэтэрээннэр чиэстэригэр ыытыллыбыта:
2013 с. – Аҕа дойду Улуу сэриитин бэтэрээнэ, САССР үтүөлээх учуутала Иван Макарович Яковлев;
2014 с. – Аҕа дойду Улуу сэриитин бэтэрээнэ, Кыһыл Сулус уонна Аҕа дойду Улуу сэриитин I истиэпэннээх уордьаннарын кавалера, СӨ үөрэҕириитин туйгуна, начаалынай байыаннай бэлэмнэнии учуутала Трофим Николаевич Жирков;
2015 с. – буойун-учуутал, Аҕа дойду Улуу сэриитин II истиэпэннээх уордьанын, «Японияны кыайыы иһин» мэтээллэр кавалердара Павел Павлович Михалев;
2016 с. – интернационалист-буойун, Кыһыл Сулус уонна кинээс Александр Невскэй III истиэпэннээх уордьаннар кавалердара, авиация майора Александр Эдуардович Петров;
2016 с. – интернационалист-буойун, Кыһыл Знамя байыаннай уордьан кавалера Усементай Николаевич Алексеев;
2017 с. – Аҕа дойду Улуу сэриитин бэтэрээнэ Прокопий Афанасьевич Степанов.
Надежда ЕГОРОВА, «Саха сирэ» хаһыат, edersaas.ru