Сунтаарга — Сергей Зверев күнэ

Бөлөххө киир:

Бэҕэһээ, муус устар 9 күнүгэр, Сунтаар  улууһун  үрдүнэн С.А.Зверев-Кыыл Уолун күнүн бэлиэтээтибит. Үөрүүлээх күҥҥэ бэһис төгүлүн ыытыллар «Олоҥхо дойдутун оһуордаах оонньуута» норуот уус-уран айымньытын күрэһин тэрийдибит.

edersaas.ru, Мария Кобельянова

Манна Ленскэйтэн, Бүлүүттэн, Үөһээ Бүлүүттэн, Ньурбаттан уонна Дьокуускайтан ааттаах-суоллаах биир дойдулаахтарбыт Наталья Михалева-Сайа, Людмила Ефимова, Никандр Тимофеев, Светлана Петрова, Варвара Обоюкова, Ирина Аввакумова, Анатолий Ермолаев уонна Сергей Зверев уола Төгүл Зверев кыттыыны ылан ытык күммүтүн суолталаан биэрдилэр. Сарсыарда өттүгэр Л.С.Ефимова, В.В.Обоюкова тойукка, И.Е.Аввакумова саха төрүт үҥкүүтүгэр маастар-кылаастары биэрдилэр. С.И.Петрова уустары, Н.В.Михалева-Сайа сүгүрүйээччилэрин кытта көрүстэ. Онтон кииннэммит библиотекаҕа Төгүл Зверев кэргэнин Анна Зверева Сибиэрэп туһунан нууччалыы кинигэтин сүрэхтээтибит.

Бу күн  аҕа баһылык Анатолий Григорьев, улуус култууратын салалтата үтүө тыллары этэн, быйыл 85 сааһын туолбут Никандр Тимофеевы эҕэрдэлээн “Култуураҕа сүҥкэн кылаатын иһин” диэн анал бэлиэни туттардылар. Ол кэннэ биэс түһүлгэнэн оһуокай, тойук, олоҥхо, үгэ, чабырҕах, норуот ырыата, хомус, маһынан уһаныыга быыстапка тэрилиннэ. Киэһэҥҥи сандалыга истиҥ көрсүһүү олохтонон, атах тэпсэн олорон Сибиэрэп тула туох-ханнык үлэ барыахтааҕын туһунан кэпсэтии буолла.

Бүгүн, эмиэ биэс сиринэн күрэстэр түһүлгэлэрэ тэриллэр, ону кытта «Бартыһаан» КК саха төрүт үҥкүүтүн күрэһэ саҕаланар. Киэһэ 18.00 чаастан бастыҥнар гала-кэнсиэрдэрэ буолуоҕа. Билиэт сыаната 200 солк. Манна Лука Егоров оһуокайга туруорбут үрүҥ көмүс илин кэбиһэрэ, Аҕа баһылык Анатолий Григорьев олоҥхоҕо туруорбут үрүҥ көмүс курун кыайыылаах хаһаайыннара биллиэхтэрэ. Кэлиҥ, көрүҥ, Бүлүү түбэтин норуот уус-уран айымньытын илдьэ сылдьааччылары көҕүлээҥ!

Мария Кобельянова,  edersaas.ru саайтка анаан, Сунтаар

+1
0
+1
0
+1
0
+1
0
+1
0
+1
0
+1
0