Сунтаарга -– «Сааскы дорҕоон»

Бөлөххө киир:

Олунньу ый 26 күнүгэр Сунтаарга С.А.Зверев-Кыыл Уолун аатынан норуот айымньытын киинигэр умнуллубат тыыннаах муусука түһүлгэтэ чахчы дуорааннаахтык олохтонон ааста. Улахан түһүлгэ суруналыыс, ырыаһыт, мелодист Михаил Семенов-Мэхээс үбүлүөйдээх 50 сааһынан тэрилиннэ.

Галина САМОЙЛОВА:

— Биһиги биир талааннаах ыччаппыт Мэхээс Сэмэнэп 50 сааһын бэлиэтиир өрөгөйдөөх түгэнин силигин ситэрэн, «Сааскы дорҕоон» диэн тыыннаах муусука түһүлгэтин тэрийэн, өрөспүүбүлүкэ араас муннуктарыттан ураты суоллаах-иистээх айар бөлөхтөрү, биирдиилээн чаҕылхай сулустары, быһата тыыннаах доҕуһуолу сэргээччилэри, толорооччулары муста. Өй-санаа, тыл-өс, дорҕоон, дьүһүйүү, доҕуһуол алыптаах ураты түһүлгэтин тоҕо тардан, Сунтаар улууһун дьонугар-сэргэтигэр умнуллубат үтүө түгэни бэлэх уунна.

Бу олохтоммут түһүлгэҕэ кыттыыны ыллылар: «Дапсы» (Дьокуускай), «Дорҕоон Дойду» (Дьокуускай), «Үргэл» (Үөһээ-Бүлүү), «Амака» (Ньурба), «Уран Куо» (Сунтаар, Маар Күөл), «Хаһыы» (Сунтаар), «Сунтаар» (Сунтаар, Дьокуускай), «Ай-Тал» (Сиэн Тиитэп), «Чолбон» (Юрий Васильев-Дьурай), «Дуораан» (Бүөккэ Бөтүрүөп), «Сунтаар» (Евгений Тазетдинов) бөлөхтөр уонна өрөспүүбүлүкэбит биирдиилээн чаҕылхай сулустара. Туһуламмыт түһүлгэҕэ тустаах эйгэ үөскээн, көрөөччү астыныыны, дуоһуйууну, өрө көтөҕүллүүнү ылан, биэс чааһы быһа буолбут кэнсиэр биир тыынынан барда. Бу буолар, чахчы, тыыннаах муусука нөҥүө саха санаатын сааһылаан толкуйдатан, уһугуннаран, сахалыы өйү-санааны үөскэтэн, дьону биир иэйиигэ сомоҕолуур ураты күүс! Маннык көрөөччү көҕүн тутар, талааннаах дьону түмэр тыыннаах муусука түһүлгэтин кэскиллээх бырайыактара олохтоно турдуннар. Инникитин да бу хайысхаҕа сайдыы суола тобулларыгар сылын ахсын өссө күүскэ тэриллэн ыытылла туруохтара диэн эрэнэбит. Ол курдук, бу иккис төгүлүн улууска ыытыллар тыыннаах муусука түһүлгэтэ Сунтаар улууһа муниципальнай тэриллии уонна Сунтаар улууһун култууратын уонна айылгытын салалтатын улахан көмөтүнэн, өйөбүлүнэн ыытыллан кэллэ уонна инникитин үгэс быһыытынан сылын ахсын ыытарга бу бырайыак болҕомтоҕо ылылынна.

Мария Кобельянова-Тускулаана:

—  Былырыын Сиэн Тиитэп көҕүлээн,  эмиэ бэртээхэй тыыннаах муусука тэрээһинэ өрө көтөҕүллүбүтэ. Онтон быйыл Михаил Семенов-Мэхээс  үйэ аҥаардаах үбүлүөйүн бэлиэтээн  өссө элбэх буолан түмүстүбүт. Бу эйгэ дьоно отой ураты дьоннор, тугу саныы сылдьаллара буолуой диэн кыл санаа кытта киирэн ылар. Бэл диэтэр, бүгүн биир киһини көрсөн кэпсэппитим. Кини:  «Араспаанньабын, ааппын умна сыстым», — диэбитэ бу маннык күүстээх тэтимтэн эт-сиин, өй-санаа, сүрэх-быар хамсаан эрэрин этэрэ буолуо дуу… Бииртэн соһуйдум: бу сүрдээх тыастаах-уустаах дьоро киэһэҕэ элбэх кырдьаҕас дьону көрөн үөрдүм, кинилэр олорон эрэ күүс-уох ылар курдуктар. Эһиги санаан көрүҥ, биэс чаастаах кэнсиэри сунтаардар биир тыынынан көрдүбүт.

Сотору биэриини  @nvksakha оҥорон таһаарыахпыт уонна «Сунтаар — Олоҥхо дойдута» ютуб ханаалга толорутун угуохпут.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0