Муус устар 20 күнүгэр СӨ үрдүнэн кииннэммит суһал штаб салалтатын кытта улуустар «Коронавирус» инфекциятын утары сүбэ мунньахха кытыннылар.
edersaas.ru
Сүбэ мунньахха СӨ Ил Дархана Айсен Николаев улуус Аҕа баһылыктарыгар оройуоҥҥа баар баахтабай бөһүөлэктэр үлэлэрин уонна дьон дьиэҕэ олоруу эрэсиимин тутуһарын күүскэ хонтуруоллуурга сорудахтаата. Роспотребнадзор Саха сиринээҕи управлениетын салайааччыта Маргарита Игнатьева иһитиннэрэринэн, «Коронавирус» ыарыытынан 60% 30-60 саастарыгар диэри, 29% 18-29 диэри саастаах эдэр дьон ыалдьыбыта бэлиэтэммит. 71,2% ыарыы судургутук ааспыт, 22,5% ыарыы уустук формалаах ааспытын иһитиннэрдэ. Сунтаар улууһугар суһал штаб иһитиннэрэринэн, Кутана нэһилиэгиттэн 4 км тэйиччи «РНГ» баахтабай бөһүөлэгэр муус устар 10 күнүгэр Мииринэй куоратынан 28 киһи үлэлии кэлбитэ бэлиэтэммит. Кэлбит дьону аэропортан тутатына служебнай массыынанан үлэлиир сирдэригэр илдьибиттэр. Билигин туһааннаах бөһүөлэккэ 52 үлэһит баар, онтон ыалдьыбыт 2 киһи миэстэтигэр харантыыҥҥа сыталлар. Баахтабай бөһүөлэктэн киирии-тахсыы бобуллан турар. Полиция түөрт үлэһитинэн күнүстэри-түүннэри кэтээн көрүү үлэтэ ыытыллар. Ирдэбил быһыытынан ыарыы биллибит сириттэн, чугас эркин дьонтон анаалыс ылылынна. Билигин лаборатория быһаарыытынан түмүктэри күүтэбит.
Сунтаардааҕы полиция начальнига Анатолий Филатов иһитиннэрбитинэн, куйаар ситимин нөҥүө Кэмпэндээйи нэһилиэгин киһитэ коронавирус ыарыытынан ыалдьыбыт диэн сымыйа сураҕы тарҕаппыт дьон аата-суола билиннэ, билигин сымыйа сураҕы тарҕатааччылар утары үлэ бара турар, тустаах дьон миэрэҕэ тардыллыахтара.
Сунтаардааҕы суһал штаб пресс-сулууспата