Ааспыт нэдиэлэ бүтүүтэ Сунтаарга, өрүс суола сабылларын баттаһа, улуус оскуолатын дириэктэрдэрэ үбүлүөйдээх бэһис спартакиадатыгар Элгээйигэ муһуннулар.
Хамсык ыарыытын икки сыллаах харантыынын кэнниттэн биир идэлээхтэри көрсөн үөрүү-көтүү, өрө көтөҕүллүү, көхтөөх кэпсээн-ипсээн күөстүү оргуйда. Спартакиада олохтоох хаһаайка Софья Игнатьева, үөрэх управлениетын начальнигынан солбуйааччы Борис Васильев, үөрэх үлэһиттэрин профсоюһун бэрэссэдээтэлэ Анатолий Новиков, спартакиаданы төрүттээччи Капитон Никифоров, оскуола дириэктэрдэрин сэбиэтин салайааччыта Афанасий Матвеев эҕэрдэ тылларынан аһылынна. Бу атын ханнык да улууска ыытыллыбат үөрэхтээһин салайааччылара чөл олоҕу, чэбдик өйү-санааны өрө тутар тэрээһиннэрэ үтүө холобур буолан тарҕана турарыгар баҕардылар.
Спорт сэттэ көрүҥэр хатыһыылаах киирсиилэр, кыл түгэнинэн кыайсыылар, кыһыылаах кыайтарыылар хамаанданан түмүгү быһаардылар. Өрүүтүн үчүгэй бэлэмнээх Владимир Архипов хапытааннаах Элгээйи куустатын хамаандата сүрдээх сытыы киирсиигэ Сунтаар түмсүүлээх хамаандатын иннигэр түһэн, үһүс төгүлүн субуруччу бастаата. Сунтаар куустата иккис, Хочо үһүс миэстэлэри ыллылар. Биирдиилээн көрүҥнэргэ кыайыылаахтар: дуобат Кирилл Марков (Элгээйи), Люция Тотонова (Хочо), саахымат Анатолий Новиков (Сунтаар), Анна Иванова (Элгээйи), теннис Михаил Максимов (Сунтаар), Люция Тотонова (Хочо), ытыы Прокопий Иванов (Сунтаар), Маргарита Иванова (Элгээйи), волейбол Элгээйи, баскетбол Сунтаар, канат тардыһыыта Элгээйи.
Өрүү буоларын курдук, волейбол оонньуута элбэх ыһыылаах-хаһыылаах, өрө көтөҕүллүүлээх түгэннэри бэлэхтээтэ. Михаил Максимов, Альбина Архангельская үрдүк кылаастаах кыраһыабай оонньуулара дьон болҕомтотун тарта. Үөрэх салайааччылара эдэрдиин эмэнниин бары мустан, көрөн турбакка көрү көҕүлүттэн тутан, спорт алыптаах эйгэтиттэн күүс-уох ылан дуоһуйа сынньанан тарҕастылар.
Мария Кобельянова, Сунтаар