Сунтаарга ойуур баһаардарын умуруорууга олохтоох нэһилиэнньэ күүскэ туруммут
Ойуур баһаардарын умуруорууга Сунтаар улууһун үөрүйэҕэ биһирэннэ. Кинилэр олохтоох нэһилиэнньэттэн 1400-тэн тахса киһини мобилизациялаабыттар.
Өрөспүүбүлүкэ үрдүнэн бу саамай элбэх киһини хаппыт улахан көрдөрүү буолара бэлиэтэннэ. Бу туһунан бүгүн, от ыйын 17 күнүгэр, СӨ Экология миниистирэ Сахамин Афанасьев ойуур баһаардарынан ыыппыт суһал ыстаап киэһээҥҥи уочараттаах мунньаҕар этилиннэ.
Мунньахха бу күннэргэ Саха сиригэр ойуур баһаардарын умуруорууга көмөлөһөн үлэлии сылдьар ойуур хаһаайыстыбатын федеральнай ааҕыныстыбатын –Рослесхоз салайааччытын солбуйааччы Александр Агафонов кытынна.
Эрэгийиэннээҕи диспетчерскэй сулууспа киэһээҥҥи иһитиннэриитинэн, өрөспүүбүлүкэҕэ 219 ойуур баһаара бэлиэтэнэр. 16 улууска 70 баһаары умуруорууга үлэ ыытыллар. Киэһээҥҥи иһитиннэриинэн биир баһаар умуруоруллубут. Ол гынан баран, уустук быһыы-майгы билигин да Горнайга, Сунтаарга, Мииринэйгэ, Хаҥаласка бэлиэтэнэр. Оттон уоту утары 2118 киһи, 254 тиэхиньикэ үлэлиир.
Александр Агафонов улуустар баһылыктарыгар баһаардары утары үлэҕэ минерализованнай балаһалары бэлэмнээһин, нэһилиэнньэлээх пууннар чугастарыгар харабыллары туруоруу, сири-уоту тиһиктээхтик кэрийэн көрө сылдьыы наадатын бэлиэтээтэ. Улуустарга үлэлиир бырамыысыланнай уонна да атын тэрилтэлэри кытары көдьүүстээх үлэни тэрийэр наадата ыйылынна. Маны сэргэ, Рослесхоз салайааччытын солбуйааччы Сунтаар улууһугар ойуур баһаардарын умуруорууга олохтоох нэһилиэнньэни мобилизациялааһын үөрүйэҕин биһириирин биллэрдэ.
Ойуур баһаардарын балаһыанньатын анаалыстыырга өрөспүүбүлүкэҕэ оробуочай бөлөх тэриллибитин туһунан этилиннэ.
+1
+1
+1
+1
+1
+1
+1