Сунтаарга «Наследники Победы» диэн виртуальнай мусуой арылынна
Ахсынньы 17 күнүгэр Сунтаардааҕы оҕо дьоҕурун сайыннарар киинигэр бу билиҥҥи үйэҕэ эппиэттиир виртуальнай мусуой оҥоһуллан, биһиги улууска сайдыы саҥа көрүҥэ тэрилиннэ.
Онно Ийэ дойду көҥүлүн уонна тутулуга суох буолуутун иһин олохторун толук уурбут биир дойдулаахтарбыт ааттара-суоллара, ханнык нэһилиэктэн, хас сыллаахха сэрии толоонугар ыҥырыллан барбыттара толору кэпсэнэр, ону сэргэ хас биирдии саллаат туох байыаннай наҕараадаҕа тиксибитэ архивтан таҥыллан сиһилии тиһиллибит. Баай матырыйааллаах виртуальнай мусуой өҥөтүнэн инникитин улууспут дьоно ким баҕалаах интерактивнай сенсорнай экран, ноутбуктар уонна дьоҕус киинэ театр нөҥүө билиитин хаҥатыан сөп.
Үөрүүлээх тэрээһиҥҥэ кэлбит ыалдьыттар улуус Аҕа баһылыга Анатолий Григорьев, баһылыгы социальнай уонна имиджевай политикаҕа солбуйааччы Гаврил Еремеев, улуус үөрэҕирии управлениетын салайааччыта Альберт Иванов, улуус култууратын уонна духуобунай сайдыытын управлениятын салайааччыта Мария Кобельянова бу саҥа тэриллибит виртуальнай мусуой дьоммутугар-сэргэбитигэр, ыччат дьоҥҥо ордук туһалаах, улахан суолталаах буолуо диэн санааларын үллэһиннилэр уонна оҕо дьоҕурун сайыннарар киин салайааччытыгар Ангелина Антоноваҕа уонна үлэһиттэргэ элбэх матырыйаалы хомуйан, таҥан улууска саҥа сүүрээни киллэрбит түбүктээх үлэлэрин иһин махтал тылларын эттилэр.
«Сунтаар улууһа (оройуона)» муниципальнай оройуон дьаһалтатын пресс-сулууспата