Арассыыйа бэрэсидьиэнэ Владимир Путин быһаччы сорудаҕынан уонна РФ бырабыыталыстыбатын уурааҕынан, коронавируһу утары охсуһа сылдьар медиктэргэ эбии төлөбүрдэр олохтоммуттара. Ону тэҥэ, Ил Дархан Айсен Николаев көҕүлээһининэн, өрөспүүбүлүкэ бүддьүөтүттэн эмиэ төлөбүрдэр анаммыттара. Бу күннэргэ өрөспүүбүлүкэтээҕи эбии төлөбүрдэри мэдиссиинэ үлэһиттэрэ туттулар.
Сунтаар улууһугар Кутана сэлиэнньэтин аттынааҕы баахта бөһүөлэгин үлэһиттэрэ коронавируһунан ыалдьаннар, улуустааҕы киин балыыһа инфекционнай салаатыгар киирбиттэрэ. Уопсайа 22 киһи эмтэммититтэн, 8 киһи үтүөрэн тахсыбыта. Билигин балыыһаҕа 14 киһи сытар.
Сунтаар оройуонунааҕы киин балыыһа кылаабынай бырааһа Светлана Иванова:
— Ыалдьыбыт дьон икки инфекционнай отделениеҕа сыталлар. Туруктара чэпчэки уонна орто диэххэ сөп. Медиктэр коронавирустаах дьону кытта быһаччы алтыһар буолан, дьиэлэригэр буолбакка, анал обсерваторга олороллор. Барыта 4 биригээдэ солбуһан үлэлиир.
Эбии төлөбүр хас күн, чаас үлэлээбиттэринэн көрөн, быраастарга, сиэстэрэлэргэ, санитардарга арааран бэриллэр, биир халыып буолбат. Өрөспүүбүлүкэттэн эбии төлөбүрү ылан, үөрэн олоробут, үлэһиттэр сүргэлэрэ көтөҕүлүннэ. Бүгүн федеральнай төлөбүр кэлэн, үлэһиттэргэ барда, — диэн кэпсээтэ.
Сунтаар улууһугар коронавируһу утары охсуһар медиктэр бу күннэргэ өрөспүүбүлүкэ бүддьүөтүттэн 355872,51 солкуобайы туттулар. Муус устардааҕы төлөбүр 28 үлэһит счетугар түстэ.
Мөлүйүөнүнэн дьону сутуйбут, сүүһүнэн тыһыынча киһи тыынын толук ылбыт кутталлаах инфекцияны утары, дьиэни-уоту, оҕону-урууну да умнан, бэриниилээхтик үлэлии-хамсыы сылдьар, дьон олоҕун быыһыыр үрүҥ халааттаах аанньалларбытыгар махталбыт улахан.
Ангелина Васильева, «Саха сирэ» хаһыат, edersaas.ru
Хаартыска: Сунтаар улууһун дьаһалтатын пресс-сулууспата.