Сунтаар улууһун дьаһалтатын, култуура уонна айылгы салалтатын, кииннэммит бибилэтиэкэ ситимин, «Ньургуһун» литературнай түмсүү тэрийиилэринэн атырдьах ыйын 30 күнүгэр Тойбохой нэһилиэгин ыһыахтыыр пааркатыгар саха норуодунай бэйиэтэ Леонид Попов аатынан «Сунтаар миигин ыҥырар» ырыа-хоһоон түһүлгэтэ ыытыллар.
— Маннык тэрээһиннэр өрөспүүбүлүкэҕэ хаһыс да сылын ыытыллан, үтүө үгэскэ кубулуйдулар. Ол курдук, ыаллыы сытар улуустарбытыгар: Үөһээ Бүлүүгэ — «Бүөтүр Тобуруокап көмүс күһүнэ», Ньурбаҕа — «Ньурба көмүс күһүнэ» ыытылланнар, нэһилиэнньэ уопсастыбаннай-култуурунай олоҕор улахан сэргэхсийиини таһааран, саҥа сүүрээни киллэрэр тэрээһин быһыытынан үрдүктүк сыаналаннылар.
Биһиги бу тэрээһиммит 2019 сылга Л.А. Попов төрөөбүтэ 100 сааһыгар анаан, өрөспүүбүлүкэтээҕи литературнай түһүлгэни ыытарга бэлэмнэнии чэрчитинэн барар.
Быйыл улууспутугар ыытылла турар Үлэ сылын чэрчитинэн, «Олоҥхо дойдутун оһуордаах оонньуута» кэлим култуурунай-спортивнай фестиваль түһүмэҕинэн бу литературнай түһүлгэни биллэрдибит. Ол эбэтэр фестиваль элбэх түһүмэхтэрдээх, онно нэһилиэктэр кытыннахтарын аайы баал эбиллэн иһэр. Сыл түмүгүнэн уопсай баал ааҕыллан, кыайыылаах быһаарыллар, — диэн улуустааҕы култуура уонна айылгы салалтатын начаалынньыга Мария Кобельянова иһитиннэрдэ.
Литературнай пикник чэрчитинэн, маннык уус-уран күрэстэр ыытыллыахтара:
«…Хоһуйар хоһооннорбор олох кинигэтин арыйабын» — Леонид Попов хоһооннорун уус-ураннык ааҕыы күрэһэ;
«Кустук араас өҥүнэн» — суруйааччы, эколог Эдуард Соколов-Тулусхан кэриэһигэр айылҕаны хоһоонунан хоһуйуу күрэһэ;
«Ньургуһун хоһуйар түһүлгэтэ» — улуустааҕы «Ньургуһун» литературнай түмсүү кыттыылаахтарын айар күрэстэрэ.
Маны таһынан, «Орто дойдуну киэргэтэн» кинигэ быыстапката, саҥа тахсыбыт кинигэлэри билиһиннэрии, кинигэ атыыта, Сунтаар улууһуттан төрүттээх суруйааччылары кытары көрсүһүү, автографтары ылыы, хаартыскаҕа түһүү, кулуһун тула олорон ирэ-хоро сэһэргэһии тэриллиэҕэ.
Саха норуотун биир улахан суруйааччыта, талааннаах тылбаасчыт, Сунтаартан соҕотох норуодунай бэйиэт Леонид Андреевич Попов аатын-суолун үйэтитэр, айар үлэтин сырдатар, саҥа суруйар талааннары арыйар, нэһилиэктэр икки ардыларыгар култуурунай, литературнай сибээһи олохтуур, айар эйгэлээх дьон бэйэ-бэйэлэрин кытта алтыһыыларын бөҕөргөтөр сыаллаах тэрээһин улууска аан бастакытын ыытыллар.
Ангелина ВАСИЛЬЕВА, “Саха сирэ” хаһыат, edersaas.ru
Хаартыскаҕа: «Ньургуһун» литературнай түмсүү актыбыыстара.