Бөлүүн, ол эбэтэр, ыам ыйын 12 күнэ үүнэр түүнүгэр, 02.00 чаас саҕана, Сунтаар сэлиэнньэтигэр Советская уулуссаҕа киһи өлүүлээх суол быһылаана тахсыбытын туһунан СӨ Госавтоинспекцията иһитиннэрдэ.
«Тойота Королла» массыынаны ыытан испит 1984 сыллаах төрүөх дьахтар иннигэр айаннаан иһэр массыынаны ситэн ааһаары, утары суолга тахсан, уруулун салайа тутууга, суол кытыытынан хааман испит икки кыыһы түҥнэри көппүт, онтон остуолбаҕа тиийэн түспүт.
Ол түмүгэр, 23 саастаах кыыс тута миэстэтигэр тыына быстыбыт, 15 саастаах кыыс ыарахан эчэйиилэри ылан, улуустааҕы балыыһаҕа киллэриллибит, туруга ыарахан.
Суоппар дьахтар бэйэтэ эмсэҕэлээбэтэх.
Бэрэбиэркэ быһаарбытынан, бу дьахтар массыынатын итирик туруктаах ыытан испит (алкотестер 0,72 мг арыгыны көрдөрбүт).
Дьүөгэтин кытта көрсүһэн, арыгылара бүтэн, ити эбии арыгы атыылаһа баран иһэн, суол быһылаанын таһаарбыт.
Уруулга олорбута түөрт сылтан ордубут, бүтэһик сылга административнай эппиэккэ тардылла сылдьыбатах.
Үс оҕолоох.
Билигин уорбаланааччыга хаарчахтыыр миэрэни быһаарар боппуруос көрүллэр, бэрэбиэркэ түмүгүнэн процессуальнай быһаарыы тахсыаҕа.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын Госавтоинспекциятын управлениета.