Ыам ыйын 15 күнүгэр Сунтаарга улуустааҕы суһал штаб салалтата коронавирус инфекциятын утары сүбэ мунньах ыытта.
edersaas.ru
Ыам ыйын 14 күнүгэр 2 киһи коронавирус дьаҥыгар хос анаалыс туттаран, балыыһаттан үтүөрэн тахсыбыттар. Билиҥҥи туругунан инфекционнай отделениеларга 12 киһи эмтэнэ сытар, вахтовай бөһүөлэккэ 30 киһи карантиҥҥа олорор, бу хаалбыт дьонтон хос анаалыс ылыллан, Дьокуускай куоракка лабораторияҕа ыытыллыбыта. Түмүктэрэ бу күннэргэ күүтүллэр.
Роспотребнадзор биэрбит сорудаҕынан дьиэҕэ олоруу режимын тутуһууга полиция өттүттэн видеокамераларынан уонна куйаар ситимин нөҥүө кэтээн көрүү үлэтэ ыытыллар. Ону таһынан, сымыйа сураҕы тарҕатыыга күннэтэ мониторинг үлэтэ барар, буруйдаах киһи административнай миэрэҕэ тардыллыан сөп.
Суһал штаб быһаарыытынан улуус үрдүнэн волонтерскай киин тэриллэн үлэлиир, онно дьиэҕэ олорор аҕа саастаах дьоммутугар эдэр ыччаттар бэйэлэрин баҕа санааларынан күүс-көмө буолаллар. Билигин улуска уопсайа 137 волонтер үлэлиир, олохтоохтортон 2142 сайаапка киирбит. Инникитин волонтердар сөптөөх инструктаж уонна бэйэни харыстанар тэриллэринэн хааччыллан дезинфекция ыытар үлэҕэ көмө буолуохтара.
Сүбэ мунньахха сүрүннээн, быйылгы суол арыллыытыгар паромнар сырыыларын торумнаатылар. Онно коронавирус утары миэрэлэргэ эппиэттиир анал ирдэбиллэр таҕыстахтарына бу ый 20 күнүттэн паромнар үлэлэрин саҕалыахтара. Улууска уопсайа 6 паром үлэлиирэ былааннанар, Сунтаар – Устье 4, Кириэстээх өттүгэр 2.
Роспотребназор ирдэбилин тутуспут атыы-эргиэн кииннэрэ бу ый 18 күнүттэн үлэлиир бырааптаналлар.
Сунтаардааҕы суһал штаб пресс-сулууспата