Ил Дархан Айсен Николаев муус устар 22 күнүнээҕи балаһыанньаны билиһиннэрдэ.
edersaas.ru
Өрөспүүбүлүкэ Аҕа баһылыга бэлиэтээбитинэн, ааспыт сууккаҕа Саха сирин 10 олохтооҕун коронавируска туттарбыт анаалыһа «положительнай» диэн бигэргэннэ. Онтон 8 киһи – Сунтаар улууһун баахтанан үлэлиир бөһүөлэккэ олорор «Бүлүү» федеральнай суолу тутааччылар. Бу иннинэ бөһүөлэк 2 олохтооҕо бу коронавирус дьаҥынан сутуллубута биллибитэ. Манна харантыын биллэриллэн, киирии да, тахсыы да суох. Кытаанах ирдэбил ыалдьыбыт дьон үтүөрүөхтэригэр диэри тутуһуллуоҕа. Бөһүөлэккэ дезинфекция үлэтэ күүстээхтик ыытыллар. Онон Сунтаар улууһугар куттал суоһаабат. Өрөспүүбүлүкэҕэ ылыллыбыт коронавируһу бохсор үлэ бу улууска эмиэ бара турар, балаһынньаны улуустаҕы оперативнай ыстаап салайааччыта Анатолий Григорьев хонтуруолга ылан олорор.
Елена ПОТОЦКАЯ, «Саха сирэ» хаһыат, edersaas.ru
Хаартыска: joker.ykt.ru