Кулун тутар 11 күнүгэр, Сунтаар улууһун киинигэр «Сунтаар ситимэ» түмсүү (салайааччы А.С. Кириллина, научнай салайааччы и.н.к. С.И. Петрова) тэрийиитинэн, «Халадаай ырбаахы» күрэһэ буолла. Манна Сунтаартан, Кириэстээхтэн, Кутанаттан, Тойбохойтон кэлэн уран көрүүлээх, көмүс тарбахтаах иистэнньэҥнэр күрэстэстилэр.
Ангелина ВАСИЛЬЕВА, “Саха сирэ” хаһыат, https://edersaas.ru
Кэнники кэмҥэ сахалыы төрүт таҥаспытын интэриэһиргиир уонна тигэр дьон элбээбитэ киһи хараҕар быраҕыллар. Ол курдук, соторутааҕыта Дьокуускай куоракка Норуот маастарын күнэ үрдүк таһымнаахтык ыытыллыбыта. Кэрэхсэбиллээҕэ диэн, улуустарга эмиэ хамсааһын тахсан эрэр.
Сунтаар Далбар Хотуттарын дьэрэкээн оһуордаах, эгэлгэ симэхтээх таҥастарын уонна сүктэр кыыһы таҥыннарыы сиэрин-туомун көрдөрбүттэрин дьон олус сэргээтэ. Сарсыардаттан орто оскуола дьиэтигэр нэһилиэктэртэн киирбит 8 иистэнньэҥ халадаай тигиитигэр күрэхтэстилэр. Ирдэбил быһыытынан, килийиэн үлэҕинэн уонна матырыйаалынан бэриллибит бириэмэҕэ халадаайы быһан уонна тигэн бүтэриэхтээхтэр. Манна саҥаны киллэриитэ, киэбин тупсаҕайа, сиигин ырааһа барыта учуоттанна. Иистэнньэҥнэр бэриллибит сорудаҕы чиэстээхтик толордулар. Тикпит халадаайдарын сонно тута киэһээҥҥи кэнсиэркэ көрдөрдүлэр.
“Сунтаар ситимнэрин” маастардара тигии кистэлэҥнэригэр маастар-кылаас ыыппыттарыгар элбэх кыыс, дьахтар сылдьан үөрэннэ. Бу олус туһалаах, интэриэһинэй үөрэтии буолла.
Күнүс 2 чаастан уулуссаҕа сахалыы таҥастаах сэлэлээн хаамыы дьону бэркэ сэргэхситтэ. Киэһэ «Добун» култуура киинигэр буолбут түмүктүүр кэнсиэркэ араас быһыылаах сахалыы халадаай ырбаахылары, кыбытык тигиилээх, ыччаттарга аналлаах уонна дьыалабыай истииллээх сэлиэттэри көрдөрбүттэрэ көрөөччүлэр болҕомтолорун тарта. Эдэр модельердар, иистэнньэҥнэр тахсан эрэллэрэ үөртэ.
Тэрээһиҥҥэ элбэх спонсор көмөлөһөн, бэрт сэргэхтик барбытын бэлиэтиэххэ наада. Ол курдук, улуус дьаһалтата гран-при хаһаайыныгар иистэнэр массыына бирииһи туруорда. Бириистээх миэстэлэргэ эмиэ иистэнэр массыынаны, миэбэли уонна «Надежда+» таҥас маҕаһыыныгар сертификаттары туттардылар. Онон, аан бастаан ыытыллыбыт диэтэххэ, “Халадаай” күрэс олус тэрээһиннээхтик барда.
Ол курдук, гран-при хаһаайкатынан Лариса Данилова буолла, киниэхэ Сунтаар улууһун дьаһалтата иистэнэр масыынаны туттарда.
1-кы миэстэни Сунтаартан Надежда Павлова ылла, киниэхэ “Корона” маҕаһыын бирииһин — эмиэ иистэнэр массыынаны туттардылар.
2-с миэстэҕэ Кириэстээхтэн Надежда Егорова таҕыста. Киниэхэ “Сардаана” кэрэ сэбэрэ киинин бирииһэ ананна.
3-с миэстэни Кутанаттан Саргылаана Кириллина ылан, “Надежда+” маҕаһыын бирииһинэн наҕараадаланна.
Ангелина ВАСИЛЬЕВА, “Саха сирэ” хаһыат, https://edersaas.ru