Ил Дархан бүгүн нэһилиэнньэ дохуотун өйөөһүн миэрэлэригэр уонна эминэн-томунан хааччыллыыга сүбэ мунньах ыытта. Бу туһунан телеграмҥа бэйэтин ханаалыгар иһитиннэрдэ.
— Билиҥҥи сааҥсыйа усулуобуйатыгар биир сүрүн соругунан социальнай өттүнэн көмүскэлэ суох нэһилиэнньэҕэ көмө уонна доруобуйа харыстабылын туруктаах үлэтэ, ол иһигэр эминэн хааччыллыы буолар, — диэн Ил Дархан суруйда.
Өрөспүүбүлүкэ улуустарыгар эминэн-томунан хааччыллыы боппуруоһа хайдаҕый? Сунтаардааҕы 28 нүөмэрдээх аптека сэбиэдиссэйэ Александра Васильева ulus.media саайтка иһитиннэрбитинэн:
— Эмп Новосибирскайтан Мииринэйгэ сөмөлүөтүнэн кэлэрин массыынанан көрсөн аҕалабыт. Дьокуускайтан массыынанан кэлэр. Онон эмп нэдиэлэҕэ хаста да кэлэ турар. Эмп омук сириттэн кэлэрэ тохтуо суоҕа диэн үрдүкү салалта этэр. Итиэннэ бэйэбитигэр Арассыыйаҕа солбуйар эмтэр баар буолуохтара, онон аһара долгуйар наадата суох, — диэтэ. Бу туһунан «Сунтаар сонуннара» хаһыат кэрэспэдьиэнэ суруйда.