Бу күннэргэ Сунтаар улууһун Аҕа баһылыга Анатолий Григорьев оробуочай сырыынан Дьокуускай куоракка тоҕоостоох боппуруостарга судаарыстыбаннай уорган бэрэстэбиитэллэрин көрсөн, бэрт хорутуулаах кэпсэтиилэри ыытта.
edersaas.ru, улуус пресс-сулууспата
Дойду президиэнэ Владимир Путин 2018-2024 сылларга 12 хайысханан, ол иһигэр «Здравоохранение», «Образование», «Демография», «Культура», «Безопасные и качественные автомобильные дороги», «Жилье и городская среда», «Экология», «Наука», «Малое и среднее предпринимательство и поддержка индивидуальной предпринимательской инициативы», «Цифровая экономика», «Производительность труда и поддержка занятости», «Международная кооперация и экспорт» национальнай бырайыактар ылыналларыгар уураах таһаарбыта. Онно олоҕуран, улуус баһылыга СӨ бырабыыталыстыбатын бэрэссэдээтэлэ Владимир Солодовтуун уонна бырабыыталыстыба бэрэссэдээтэлин бастакы солбуйааччыта Алексей Стручковтуун көрсөн, Сунтааар нэһилиэгэр инникитин “РТС” түөлбэтин диэкки 240 миэстэлээх саҥа оҕо саадын тутуутун боппуруоһун быһаарыстылар. Оҕо саадын тутуутун бырайыагын үбүлээһинэ «Демография» национальнай бырайыагар киирэн, 2019 сылтан тутуу далааһыннаахтык саҕаланар.
Ону таһынан, «Сунтарцеолит» ХЭУо оҥорон таһаарар «Пеноцеолит» диэн матырыйаалтан суол оҥоруутугар уонна өрөмүөннээһинигэр табыгастаах бырайыагы сэргээн, барыстааҕын уонна туһалааҕын боруобалаан көрөөрү, СӨ тыраанспарын уонна суол хаһаайыстыбатын миниистирин солбуйааччы Сергей Владимировы кытары сүбэ мунньахха кытынна. Быйыл бырайыак сметатын оҥорон, 2020 сылга боруобаҕа 500 кэриҥэ миэтирэ уһуннаах Устье — Кэмпэндээйи суолугар эксперимент быһыытынан суол оҥоһуллара былааннанар.
Ил Дархан уонна бырабыыталыстыба дьаһалтатын салайааччыта Афанасий Владимиров салайыытынан, Саха сирэ биир киэн туттар судаарыстыбаннай уонна бэлитиичэскэй деятелэ, «Хотугу Сулус» уордьан бастакы кавалера, КПСС КК инструкторынан үлэлии сылдьыбыт Павлов Владимир Гаврилович төрөөбүтэ 90 сылыгар анаан Ил Дархан Айсен Николаев уурааҕынан хамыыһыйа тэриллэн үлэлиир. Хамыыһыйа чилиэттэрин көрсөн сквер тутуутун, Владимир Гаврилович үлэтин-хамнаһын, олоҕун сырдатар сыаллаах өйдөбүнньүк кинигэ таһаарыытыгар баһаарыныылары ыллылар.
«Сунтаар улууhа (оройуона)» муниципальнай оройуон дьаһалтатын пресс – сулууспата