Сунтаарга дьаҥы утары охсуһууга үлэлии сылдьар миэдиктэри наҕараадалаатылар
Сунтаарга ахсынньы 24 күнүгэр аан дойдуну аймаабыт дьаҥ ыарыытын утары охсуспут улуус маҥан халааттаах аанньалларын уонна күүс-көмө буолбут дьону наҕараадалаатылар.
Улуус Аҕа баһылыга Анатолий Григорьев дьаҥ ыарыыны утары охсуһууга үлэлээбит үрүҥ халааттаах аанньалларга, улууспут туһааннаах тэрилтэлэригэр, урбаанньыттарга, общественниктарга уонна бэйэлэрин баҕа санааларынан күүс-көмө буолан волонтердаабыт ыччаттарга күнү-түүнү аахсыбакка, утуйары, сынньанары умнан туран көмөлөспүттэрин иһин истиҥ махтал тыллары анаата.
Салгыы тэрээһин үөрүүлээх чааһыгар СӨ доруобуйа харыстабылыгар өр сыллаах үлэтин, дойду үрдунэн тарҕаммыт дьаҥ ыарыыны утары үлэҕэ тус кылаатын иһин «СӨ доруобуйа харыстабылын туйгуна» бэлиэни Сунтаар оройуонун киин балыыһатын ковиднай отделениетын санитаркатыгар Любовь Авеловаҕа туттарылынна.
Сунтаар улууһун доруобуйа харыстабылын сайдыытыгар сүдү кылааттарын, үрдүк ситиһиилээх үлэлэрин иһин Сунтаар улууһун Бочуотунай грамоталарынан уонна үрүҥ көмүс бэлиэлэринэн Сунтаар улууһун кылаабынай бырааһын эмтиир үлэҕэ солбуйааччы Константин Павлов, Сунтаар оройуонун киин балыыһатын ковиднай отделениетын медицинскэй сиэстэрэтэ Нюрбина Степанова, киин балыыһа суһал көмөтүн эпидбригадатын суоппара Владимир Максимов уонна терапевтическай отделение медицинскэй сиэстэрэтэ Мира Гуринова наҕараадаланнылар.
Сунтаар улууһун доруобуйатын харыстабылыгар үрдүк өҥөлөөх, өр сылларга нэһилиэнньэ доруобуйата чөл туруктаах буоларыгар таһаарыылаах үлэлэрин иһин «Сунтаар улууһугар доруобуйа харыстабын сайдыытыгар кылаатын иһин» бэлиэлэри Сунтаар улууһун киин балыыһатын эпидемиолог бырааһыгар Марианна Яковлеваҕа, Сунтаар улууһун кылаабынай бырааһын тэрийэр үлэҕэ солбуйааччы Нюргустана Тимофееваҕа, киин балыыһа клинико-диагностическай лабораториятын сэбиэдиссэйигэр Вилюя Тойтоноваҕа уонна реанимация отделениетын медицинскэй сиэстэрэтигэр Саргылана Поповаҕа туттардылар.
Үтүө санаанан салайтаран дойду үрдүнэн тарҕаммыт дьаҥ ыарыыны утары охсуһууга сүдү кылааттарын иһин Сунтаар улууһун грамоталарынан доруобуйа харыстабылын, улуус дьаһалтатын, үөрэҕирии, култуура салаатын үлэһиттэрэ, ону сэргэ С.А Зверев – Кыыл Уола аатынан улуустааҕы норуот айымньытын киинин коллектива, Сунтаардааҕы сокуоннай саастарын ситэ илик оҕолору реабилитациялыыр “Кэскил” социальнай киин коллектива, Сунтаардааҕы технологическай колледж коллектива, Сунтаардааҕы олорор дьиэ-уот, коммунальнай хаһаайыстыбатын коллектива, улуус общественниктара наҕараадаланнылар.
Дьаҥ ыарыыны утары үлэҕэ көмөлөрүн, тус кылааттарын иһин Сунтаар улууһун махтал суруктара Сунтаардааҕы оҕо сайдар киинин коллективыгар, Сунтаардааҕы коррекционнай оскуола-интернат коллективыгар, Сунтаардааҕы санаторнай оскуола-интернат коллективыгар, Сунтаар нэһилиэгин 1 нүөмэрдээх «Туллукчаан», 2 нүөмэрдээх «Сардана» уонна 7 нүөмэрдээх «Солнышко» оҕо саадтарын коллективыгар туттарылыннылар.
«Сунтаар улууhа (оройуона)» муниципальнай оройуон дьаһалтатын пресс-сулууспата