Сунтаар кииннэммит библиотечнай ситимэ ааспыт 2021 сыл түмүгүнэн
бастыҥ үлэһиттэрин чиэстээтэ.
Сыл тухары киэҥ билиилэрин-көрүүлэрин, салайар-тэрийэр дьоҕурдарын кыайа тутан, инники олохпут сайдарын туһугар үлэлии-хамсыы сылдьар бибилэтиэкэ үлэһиттэрин эҕэрдэлээтилэр. Ол курдук Уйбаан Нуолур аатынан Элгээйитээҕи модельнай бибилэтиэкэ «Култуура» национальнай бырайыак чэрчитинэн «Создание муниципальных библиотек нового поколения» күрэскэ кыайан 5 мөл. суумалаах субсидия ылла. Быйыл бу үбүнэн билиҥҥи ааҕааччы ирдэбилигэр эппиэттиир оборудованиелар ылыллан, өрөмүөн үлэтэ ыытыллан, күһүн саҥа аныгылыы бибилэтиэкэ арыллыаҕа. Л.А.Попов аатынан оройуоннааҕы бибилэтиэкэ өрөспүүбүлүкэтээҕи тус сыаллаах бырагыраама күрэһин кыайыылааҕа буолан, «модельнай» бибилэтиэкэ статуһун ылан, 1 мөл. 300 тыһ. солк. өрөспүүбүлүкэттэн субсидия ылла. 2021 сыл түмүгүнэн СӨ тыа сирин култууратын тэрилтэлэрин бастыҥнарын аатын ылбыт Тойбохойдооҕу модельнай бибилэтиэкэ «Бастыҥ бибилэтиэкэ», онтон өрөспүүбүлүкэ «Сыл бастыҥ култууратын үлэһитэ» үрдүк ааты Данилова Людмила Афанасьевна Кириэстээх бибилэтиэкэтин кылаабынай бибилэтиэкэрэ ылла.
Сыл түмүгүнэн библиографическэй үлэҕэ бастыҥ үлэлээх Күүкэй, кыраайы үөрэтиигэ Кэмпэндээйи, Күндэҕэ аналлаах тэрээһиннэр түмүктэринэн Аллыҥа, фонданы кытта үлэҕэ Бүлүүчээн, сүрүн көрдөрүүлэргэ Сиэйэ бибилэтиэкэлэрэ бастыҥнар ааттарын ыллылар. Маны таһынан, оҕолору кытта үлэҕэ бастыҥ бибилэтиэкэр аатын ааспыт сылга өрөспүүбүлүкэҕэ, дойду таһымыгар үгүс ситиһиилээх Сунтаар оҕо бибилэтиэкэтин сүрүннүүр библиограба Светлана Дмитриевна Иванова ылыан ылла. «Бастыҥ блог» анал ааты Элгээйи модельнай бибилэтиэкэтэ, онтон «Бастыҥ волонтерунан» Куокуну кылаабынай бибилэтиэкэрэ Жанна Генерова буоллулар. Кыайыылаахтар анал дипломнарынан уонна 5 тыһ. солкуобай бириэмийэнэн наҕараадаланнылар. РФ бибилэтиэкэлэрин ситимигэр киирбит Элгээйи модельнай бибилэтиэкэҕэ улуус култууратын салалтата анал диплом уонна «ЗУМ» студияҕа полиграфическэй өҥөҕө 5000 солк. туоһу суругу туттарда. Ити курдук оройуон бибилэтиэкэлэрэ ыытар кэскиллээх үлэлэрин үтүө түмүктэрин таһаардылар, бастыҥнар ааттаннылар.
Мария Кобельянова, Сунтаар