СӨ ситэриилээх былааһын ааспыт сыллааҕы үлэтин отчуота бүтэһик биэтэгэр чугаһаата. Бүгүн Сунтаар улууһугар ситэриилээх былаас отчуота үс сиэссийэҕэ арахсан үлэлээтэ.
Бастакы сиэссийэҕэ 14 нэһилиэк кытынна. Видео-кэмпириэнсийэ эрэсиимигэр барыта 712 киһи холбонон кытынна уонна 68 ыйытыы киирдэ.
Санатар буоллахха, Сунтаар улууһугар 26 нэһилиэк баар. Ол иһин үс сиэссийэҕэ арахсан үлэлээтилэр. Бастакы сиэссийэҕэ Аллаҥа, Арыылаах, Бордоҥ, Бүлүүчээн, Дьаархан, Илимниир, Кэмпэндээйи, Кириэстээх, Куокуна, Кутана, Күүкэй, Күндэйэ уонна Наахара нэһилиэктэрэ кытыннылар. Мунньаҕы СӨ тас сибээскэ уонна Саха сирин норуоттарын дьыалаларыгар миниистирэ Гаврил Кириллин салайан ыытта.
Сүрүн дакылааты СӨ Бырабыыталыстыбатын бэрэссэдээтэлин солбуйааччы Михаил Никифоров оҥордо. Кини ааспыт сыллааҕы үлэ түмүктэриттэн саҕалаан быйылгы былааны иһитиннэрдэ.
Салгыы биэдэмистибэлэр салайааччылара олохтоохтор ыйытыыларыгар хоруйдаатылар. 14 нэһилиэк олохтоохторо сүрүннээн доруобуйа харыстабылын, ОДьКХ, тутуу уонна тыа хаһаайыстыбатын боппуруостарыгар ыйытыылары биэрдилэр. Холобур, үгүс нэһилиэктэргэ биэлсэрдэр суохтарын таһынан эмп-том тиийбэтэ ыйылынна. Ону тэҥэ, тыа сиригэр ыччаты үлэлэтэр инниттэн бэтэринээрдэр хамнастарын үрдэтэргэ этии киллэрдилэр. Үгүс дьон улууска социальнай хабааннаах эбийиэктэргэ (оскуола, оҕо саада, култуура дьиэтэ) хапытаалынай өрөмүөн хаһан ыытылларын ыйыталастылар.
Мунньах түмүгэр, Сунтаар улууһун баһылыга Анатолий Григорьев тустаах тэрээһиҥҥэ 68 ыйытыы киирбитин этэн туран, олор бары боротокуолга тиһиллибиттэрин туһунан иһитиннэрдэ.