Бүгүн, олунньу 13 күнүн түүнүгэр, Сунтаар сэлиэнньэтигэр алта киһи өлүүлээх баһаар буолла. Түүн 03 ч 42 м Сунтаарга Бартыһаан уулуссатыгар турар чааһынай дьиэ кырыыһата буруолуур диэн суһал иһитиннэриини ааһан иһэр киһи эрийэн тыллаабыт эрээри, аадырыһы чуолкай эппэтэх. Баһаарынайдар 03 ч 53 м. кэлиилэригэр уот түннүктэртэн уһуура турара. 03 ч 54 м уоту умуруоруу суһаллык саҕаланан 04 ч 30 м бохсуллубут. 2020 сыллааҕы тутуу барыта кэриэтэ былдьаммыт, 75 кв. м иэннээх сири сиэбит. Дьиэ уотунан сылытыллар эбит.
Алта киһи уокка былдьанна (икки улахан киһи, түөрт оҕо). Билигин ким буруйдааҕа, төһө хоромньу оҥоһуллубута быһаарыллар.
Ил Дархан Айсен Николаев быһылааҥҥа былдьаммыт ыал чугас дьонугар кутурҕанын тириэртэ.
Бырабыыталыстыба Бэрэссэдээтэлин бастакы солбуйааччы Дмитрий Садовников улуус баһылыктара кыттыылаах видеконференция нөҥүө мунньах ыытта. Кини улуус баһылыктарыгар нэһилиэнньэ уоттан сэрэхтээх буолуутугар эбии миэрэ ылыналларын дьаһайда.
Сыл саҕаланыаҕыттан 248 баһаар турбут. Былырыыҥҥы көрдөрүү — 270. Баһаар биир үксүн уот тэрилин туттуу быраабылатын кэһиититтэн тахсар.
edersaas.ru