Сунтаар улууһугар киэҥ-куоҥ, сырдык, сылаас саҥа хотоннор тутуллан, бу күннэргэ үлэҕэ киирдилэр.
edersaas.ru
Сэтинньи 20 күнүгэр Сунтаар улууһун Аҕа баһылыга Анатолий Григорьев, тыа хаһаайыстыбатын управлениетын салайааччыта Иван Тихонов уонна баайга-дуолга сыһыаннаһыы кэмитиэтин салайааччыта Сергей Барамыгин Кириэстээххэ саҥа ирдэбилгэ эппиэттиир буойуна, Дьаархаҥҥа уонна Илимнииргэ 50-нуу миэстэлээх хотоннор, Кутанаҕа 100 миэстэлээх саҥа комплекс үлэҕэ киирэр үөрүүлээх аһыллыы тэрээһиннэригэр сылдьан, бар дьоҥҥо бэйэ оҥорбут бородууксуйатынан күндүлээн, үүнэ-сайда туруҥ диэн мааны алгыс тылларын анаатылар.
Кириэстээх нэһилиэгэр Владимир Егоров бэрэссэдээтэллээх «Крестях» тыа хаһаайыстыбатын кээпэрэтиибин саҥа тэрилинэн хааччыллыбыт буойуна арыллыытыгар нэһилиэк баһылыга Александр Григорьев, СӨ тыатын хаһаайыстыбатын үтүөлээх үлэһитэ, айылҕа харыстабылын туйгуна, «Хотугу Сулус» уордьан кавалера Михаил Коколов уонна Үлэ Албан аат уордьан толору кавалера, СӨ норуотун хаһаайыстыбатын үтүөлээх үлэһитэ, «Хотугу Сулус» уордьан кавалера Владимир Михайлов бэйэлэрин кэс тылларын анаатылар.
Кылаабынай зоотехник Августина Трифонова сыах тутуутугар төһүү күүс буолбут дьоҥҥо махтанан туран сыах тутуллуоҕуттан хайдах тэрээһин үлэтэ барбытын сырдатта. Мустубут дьоҥҥо сыахха киирбит сүөһү астанарын, үлэ автоматизация нөҥүө хаамыытын көрдөрдүлэр. Сыахха атыыга бэлэм аныгылыы сууламмыт эт бородуукталара көрдөрүүгэ турда.
Дьаархан нэһилиэгэр крестьянскай фермерскай хаһаайыстыбалаах Иван Семенов 50-ча хороҕор муостаах киирэр аныгылыы тииптээх каркаснай саҥа хотону тутан дьэндэттэ.
Семеновтар дьиэ кэргэн оҕолорун ыарахан үлэттэн толлубат, ылсыбыт дыалаларын тиһэҕэр тириэрдэр үтүө үлэһит дьон гына иитэн таһаарбыттарын нэһилиэк олохтоохторо биһирии кэпсииллэр. Ол да иһин, эдэр фермер Иван Семенов СӨ Тыа хаһаайыстыбатын министиэристибэтин гранын ылан төрөөбүт дойдутугар эдэрдэргэ үтүө холобур буолан үлэлии-хамсыы сылдьар. Хотону бырайыактаан туппут прораб Станислав Семенов тутууга төһүү күүс буолбут дьону ахтан-санаан махтал тылларын анаата.
Үөрүүлээх тэрээһиҥҥэ нэһилиэк баһылыга Максим Архипов уонна олохтоохтор эҕэрдэ тыл маанытын эттилэр. Хаһаайыттар сандалы остуолларыгар бэйэ оҥорон таһаарар бородууксуйатын – сип сибиэһэй сыыры ыалдьыттарга амсаттылар.
Илимниир нэһилиэгэр крестьянскай фермерскай хаһаайыстыбалаах Александр Антонов дьиэ кэргэнэ 50 миэстэлэх саҥа хотон туттубут.
Хаһаайыттар хороҕор муостааҕы таһынан хотонноругар кууруссалары уонна кроликтары иитэн тураллар. Инникитин бэйэлэрин кыахтарынан хотоҥҥо иккис этээс тутан ичигэс теплица туттар былааннаахтар.
Кутана нэһилиэгэр Яков Егоров бэрэссэдээтэллээх «Сомоҕо» тыа хаһаайыстыбатын кээпэрэтиибэ 100 миэстэлээх сүөһү иитэр комплекс тутан үлэҕэ киллэрдилэр.
Саҥа эбийиэк аһыллыытыгар сахалыы сиэри-туому тутуһан нэһилиэк баһылыга Николай Давыдов уонна хотон тутуутугар күүс-көмө буолбут «Күүкэй» тыа хаһаайыстыбатын кэпэрэтиибин салайааччыта Данил Федоров аал уоту аһатан алгыстаах тылларынан астылар. Тыа сирин сибиэһэй бэйэ оҥорон таһаарбыт бородууксуйата дэлэйэригэр эдэр үлэһиттэр саҥа аныгылыы хотоҥҥо таһаарыылаахтык үлэлииллэригэр инникитин олорор дьиэнэн хааччыйыы былааннанар.
«Сунтаар улууhа (оройуона)» муниципальнай оройуон дьаһалтатын пресс-сулууспата