Дьиэ кэргэн, таптал уонна бэриниилээх буолуу бэлиэ күнүгэр Сунтаарга биир үөрүүлээх түгэн бэлиэтэннэ.
edersaas.ru, Юлия Алексеева
Бу туһунан Сунтаардааҕы ГТАС салайааччыта Анна Васильевна Григорьева билиһиннэрэр:
— Бүгүн Сунтаар нэһилиэгин 50 сыл бииргэ олорбут икки дьиэ кэргэттэригэр Гуриновтарга уонна Копыловтарга «Дьиэ кэргэн килбиэнэ» диэн бэлиэ туттарылынна. Ирина Семеновна уонна Тимофей Гаврильевич Гуриновтар 1970 с. ыал буолбуттара. Тимофей Гаврильевич тыа хаһаайыстыбатын уонна сибээс бэтэрээнэ. Ирина Семеновна сибээс, үлэ бэтэрээнэ. Кини өр сылларга Сунтаардааҕы почтовай сибээскэ телефонистканан үлэлээбитэ. 4 оҕоҕо күн сирин көрдөрөн, билигин элбэх сиэн, биир хос сиэннээхтэр. Иккис дьиэ кэргэн Елизавета Егоровна уонна Владимир Петрович Копыловтар эмиэ 1970 с. ыал буолбуттара. Владимир Петрович тыа хаһаайыстыбатын бэтэрээнэ, Сунтаар улууһун, нэһилиэгин бочуоттааҕа, Елизавета Егоровна хас да нэһилиэккэ уус-уран салайааччынан, кэлин госстрах тэрилтэ агенынан үлэлээбитэ. «Сунтаар улууһун култууратын сайдыытыгар кылаатын иһин» бэлиэ хаһаайката, 4 оҕолоохтор, элбэх сиэн уонна биир хос сиэннээхтэр. Бу дьиэ кэргэттэрбитин улуус дьаһалтатыттан Тамара Ивановна Иванова уонна олохтоох дьаһалтаттан Люция Егоровна Иванова буолан тиийэн көрсөн эҕэрдэлээтибит.
Холобур буолар, мааны дьиэ кэргэттэргэ истиҥ эҕэрдэ!
Юлия АЛЕКСЕЕВА, Сунтаар
edersaas.ru