Сунтаардааҕы технологическай колледж устудьуоннара аудио остуоруйалары оҥорон саҕалаатылар. Билиҥҥи кэмҥэ үгүс төрөппүт, эбээ,эһээ «оҕобут төлөпүөнтэн арахпат, омук тылын кытта билэр буолла» диэн этэллэрэ олохпут кырдьыга.
edersaas.ru, Юлия Алексеева
Оҕолорун туһугар кыһаллар, киэһэтин утуйуох иннинэ «остуоруйалаһар» төрөппүттэргэ улахан абыраллаах саҥа ютуб ханаал баар буолла. Бу Сунтаардааҕы технологическай колледж устудьуоннара биллэр-биллибэт остуоруйалары сахалыы саҥаран, аудио ханаал тэрийдилэр. Саҥа саҕалааһын ааптара колледж английскай тылын преподавателэ, 3 оҕолоох эдэр ийэ Мирослава Матвеевна Уарова:
— Билигин олохпут сайдыыта сүрдээх тэтимнээх. Мантан оҕо сайдарыгар сөптөөҕүн таба көрөн туһаныы төрөппүт ытык эбээһинэһэ. Мин оҕолорум остуоруйаны сэҥээрэллэр.Күн ахсын саҥаттан-саҥаны булар, айар, кэпсиир сылаалаах. Ол иһин аудио остуоруйалары хайдах эрэ толкуйдаабыт киһи диэн санаалааҕым. Хата устудьуоннарым күүс-көмө буолан, бу баҕа санаа олоххо киирдэ. Сахалыы саҥарбыт усутудьуоннарбыт Саргылаана Николаева, Софрон Джуалов. Аудиозаписьпытын Дьулустаан Николаевич Андреев монтажтаан көмөлөстө. Инникитин даҕаны саҥа остуоруйалары сахалыы «саҥардан», ютуб ханаалга киллэрэр санаалаахпыт. Бу бырайыагы олоххо киллэриэх иннинэ, устудьуоҥкам НПК-ҕа кыттарга дакылаат бэлэмнииригэр ыйытык оҥорбуппут. Оҕо уһуйааныттан 120 оҕоттон 50 эрэ оҕо сахалыы, 70 оҕо нууччалыы саҥараллар. Бу тыа сиригэр диэтэххэ, улахан көрдөрүү дии санаабыт. Төрөөбүт тылын билбэт оҕо атын омук тылын, атын билиини ылара уустуктардаах. Онон төрөппүттэр оҕолоргутугар кыраларыттан маҥнай төрүт тыллара сайдарыгар болҕомто уураргыт ордук диэн этиэхпитин баҕарабыт.
Төрөппүт санаата
Елена Афанасьевна, 4 оҕолоох ийэ:
— Билигин оннооҕор кыра оҕолор ютуб ханаалын күүскэ баһылаатылар. Бу колледжтар наһаа үчүгэй остуоруйа ааҕар ханаалын тэрийбиттэригэр улахан махтал. Хас киэһэ аайы остуоруйа кэпсээри гыннахха, сороҕо умнуллар, кыра оҕолордоох киһи түбүгэ элбэҕиттэн бэйэ айан-толкуйдаан кэпсиирэ уустук. Онон билигин сибээс үчүгэй буоллар эрэ, ити ханаалы мэлдьи туһанар буолуоҕум. Салгыы сайдан истиннэр!
Юлия АЛЕКСЕЕВА, edersaas.ru