Сунтаарга агро-хайысхалаах алта оскуола баар. Онтон Сунтаардааҕы 2 №-дээх оскуола гидропоника ньыматынан үлэлээн өлгөм үүнээйини ылар, бэл диэтэр, муохха үүнэн турар оҕурсуну кытта көрүөххэ сөп.
edersaas.ru, Мария Кобельянова
Ойуур муоҕугар үүнээйини олордуу экологическай өттүнэн ыраас буолар. Маны оскуола холобуругар туһанан маастар Василий Хаптасов арааһы тобулар. Билигин «өйдөөх» тэпилииссэлэр баар буолуохтаахтар. Хара көлөһүнү таһаарбакка, үүнүүнү хайдах баҕарар өлгөмнүк ылыахха сөбүн туһунан Василий элбэҕи кэпсээтэ.
Аныгы автоматизация ньыматынан үлэлиир сайдыылаах тэпилииссэҕэ үүнээйи арааһа баар: оҕурсу, помидор, перец, дьэдьэн, ону таһынан, үс тыһыынчаттан тахса сибэкки олордуллубут. Маны барытын оҕолор көрөллөр.
Сотору үүнээйилэр сайыҥҥы тэпилииссэлэргэ тахсыахтара. Онно 30-ча оҕо хамнаска үлэлиэҕэ. Оскуола маннык холобурунан бизнеһинэн дьарыктанар ыччаты бэлэмнээн таһаарар сыаллаах. Салайааччы Василий Иванов агро-хайысханы сайыннарыыга былаана киэҥ, быйыл нэһилиэк дьаһалтатыттан сир арендалаан хортуоппуй олордуохтара, тыраахтар ыытарга үөрэтиэхтэрэ. Күөх үүнээйинэн дьарыгырар оскуола сотору оранжереятын, кылаастарын сэдэх сибэккилэринэн толоруоҕа уонна хортуоппуй олордуоҕа. Сунтаарга Экология сылыгар бу оскуола холобур эрэ буолар. Санатан эттэххэ, оскуола 2015 сыллаахха Ил Дархан 1 мөл.750 тыһ. солк. гранын кыайыылааҕа буолан гидропониканы сайыннарар.
Мария Кобельянова, edersaas.ru